جمال

أفضل 10 تونر للبشره الجافه

أفضل 10 تونر للبشره الجافه . اتكلمنا في موضوع فات عن أهمية التونر و وضحنا الدور اللي بيقوم بيه في العنايه بالبشره و زي ما هو مهم لاصحاب البشره الدهنيه فـ هو كمان مهم جدًا لاصحاب البشره الجافه لان مش البشره الدهنيه بس اللي بتحتاج تنضيف عميق لكن كمان البشره الجافه محتاجه تنضيف عميق من الاوساخ و الاتربه اللي بتتراكم عليها ، و الاكيد ان الانواع المستخدمه للبشره الجافه مختلفه تمامًا عن الانواع المستخدمه للبشره الدهنيه و في الموضوع ده هنتكلم عن أفضل 10 تونر البشره الجافه مختلفين في السعر و الجوده و انتي تقدري تختاري المناسب ليكي حسب ميزانيتك.

أفضل 10 تونر للبشره الجافه
أفضل 10 تونر للبشره الجافه

أهمية التونر للبشره الجافه

وضحنا الدوافع اللي تخلينا نستخدم تونر بشكل اساسي لو بشرتنا دهنيه في موضوع فات زي الحفاظ علي ان المسام متوسعش او ان كمان تبان شكلها اصغر لو هي في العادي واسعه و غيرهم كتير من الاسباب ، لكن ايه يخليني لو بشرتي جافه استخدم تونر بعيدًا عن نقطة التنضيف ؟ التونر المستخدم للبشره الجافه عادةً بيدخل ضمن مكوناته مواد مرطبه و مهدئه تساعد الجلد يبقي شكله صحي اكتر و رطب و كمان تهدي اي التهابات موجوده فيه و المواد دي زي البانثينول او الـ Madecasosside او ماء الورد و غيرهم كتير.

أفضل 10 تونر للبشره الجافه

10- كلينيك كلاريفاينج لوشن 1 / Clinique Clarifying Lotion 1

Clinique Toner
Clinique Toner

لما اتكلمنا عن تونر البشره الدهنيه قولنا ان البشره الدهنيه بتحتاج تونر داخل ضمن مكوناته أحماض مقشره للجلد لكن هل ممكن يبقي في تونر للبشره الجافه بيحتوي علي مقشرات و في نفس الوقت يرطّب الجلد ؟ التونر ده من كلينيك حقق المعادله الصعبه دي و بالفعل بيحتوي علي حمض الساليسيليك اللي بيساعد في تقشير خلايا الجلد الميته و في نفس الوقت بيحتوي علي حمض الهيالورونيك للترطيب ، التونر ده منعش جدًا للجلد و مش بيسبب اي تهيج لكنه سعره عالي جدًا و توفره في مصر صعب.

9- ايتيود هاوس مويستفل كولاجين تونر / Etude House Moistfull Collagen Facial Toner

Etude House Moistfull Toner
Etude House Moistfull Toner

سمعتي قبل كده عن الكولاجين ؟ الكولاجين ده بروتين موجود في جلدنا بشكل طبيعي لكنه بيبدأ يقل مع تقدم السن و دكاترة الجلديه بتنصح باستخدام منتجات فيها كولاجين من بعد سن الـ 25 و ده اللي هتلاقيه في التونر الكوري ده ، هو تونر خالي من الكحول و الزيوت المعدنيه و السيليكون و اي مكون ممكن يسد مسام البشره ، بيرطب الجلد و ينعمه و في نفس الوقت يرجعله النضاره اللي فقدها نتيجه للجفاف.

8- نيڤيا سوزينج تونر / Nivea Soothing Toner

Nivea Toner
Nivea Toner

نيڤيا من الماركات التجاريه المعروفه من قديم الأزل حتي اجدادنا و امهاتنا يعرفوها و لحد النهارده بتنتج منتجات الناس بتحبها زي التونر ده كده ، هو تونر غير طبي طبعًا فـ منصحش به اصحاب البشرات الحساسه لكنه جيد جدًا و بيحتوي علي الكاموميل و الصبار المعروفين بقدرتهم علي تلطيف و تهدئة التهابات الجلد ، غير كده كمان هو خالي من الكحول و بينضف مسام البشرة بعمق و الاهم انه متوفر في الصيدليات و سعره حوالي 130 جنيه مصري.

7- يورياچ ثيرمال ووتر / Uriage Thermale Water

Uriage Thermal water
Uriage Thermal water

المياه الحراريه من اشهر المكونات اللي بتلطّف الجلد و موجوده في ماركات عالميه كتير جدًا و كمان نفس الماركات دي بتدخلها كـ مكون اساسي في كل منتجاتها ، كتير من البنات بتحب جدًا تستخدم المياه الحراريه كـ تونر خصوصًا لو بشرتهم جافه و ده لانها مش بتجفف الجلد بالعكس بترطّبه و تهديه و سهله في الاستخدام لانها دايمًا بتكون في هيئة اسبراي و هي فعلًا اختيار كويس جدًا لكن مش هتقدري تنضّفي بيها بشرتك لانها مش بتتمسح ، سعر مياه يورياچ الحراريه حوالي 170 جنيه للحجم الصغير و متوفره في كل الصيدليات الكبيره.

6- اوريفليم لاڤ نايتشر نوريشينج تونر / Oriflame Love Nature Nourishing Toner

Oriflame Toner
Oriflame Toner

ناس كتير اوي بتفضل منتجات اوريفليم و ده لان اسعارها مناسبه جدًا و الكل يقدر يشتريها و متوفره بسهوله كمان و لو انتي بشرتك جافه لكن غير حساسه و بتدوري علي تونر ينضف بشرتك و ينعمها و ميسببش اي احساس بالجفاف تقدري تختاري التونر ده لانه بيحتوي علي القمح و لطيف جدًا علي الجلد لكنه بيحتوي علي عطور فـ لو بشرتك حساسه منصحش بيه ، تقدري تلاقيه عند كل مندوبات اوريفليم و سعره بيختلف علي حسب كتالوج كل شهر لكنه رخيص.

5- ڤيشي بيوريتيه ثيرمال 3×1 / Vichy Puretè Thermale 3 in 1

Vichy Toner
Vichy Toner

التونو ده اتكلمت عنه في التونر الخاص بالبشره الدهنيه و قولت انه مناسب للبشره الدهنيه و كمان هو مناسب للبشره الجافه لانه بيجمع بين حاجتين مهمين جدًا و هما انه مش بيطلّع حبوب ابدًا و كمان مش بيجفف البشره ، هو 3 خطوات في واحد يعني تقدري تستخدميه كـ غسول او تونر او مزيل ميك اب و فعلًا هو فعال في استخدامه الـ 3 استخدامات خاصًة التونر و ازالة المكياج ، ميزته كمان هي انه متوفر و سهل تلاقيه في اي صيدليه بسعر 230 جنيه مصري تقريبًا.

4- ذا بودي شوب ڤيتامين إي هيدراتينج تونر / The Body Shop Vitamin E Hydrating Toner

The body shop Vitamin E toner
The body shop Vitamin E toner

كل يوم بنكتشف وجود ماركات جديده في السوق منها لكن مهما بتظهر ماركات كويسه بتفضل برده ذا بودي شوب من اقرب الماركات للناس و ده لان منتجاتها معتمده بشكل كبير علي المكونات الطبيعيه رغم انها ماركه غير طبيه ، و تونر ڤيتامين إي من ذا بودي شوب بيفضل من أفضل التونر للبشره الجافه لانه بيحتوي علي زيت جنين القمح المعروف بقدرته العاليه علي ترطيب الجلد و كمان ڤيتامين E اللي يعتبر من اهم مضادات الاكسده ، مش بيجفف الجلد ابدًا رغم تنضيفه العميق و الميزه انه متوفر في فروع ذا بودي شوب في مصر المتواجده في مول مصر و مول العرب و غيرهم.

3- كوزركس سنتلا ووتر تونر / COSRX Centella Water Alcohol-Free Toner

Cosrx Centella Water Toner
Cosrx Centella Water Toner

منتجات كوزركس من افضل المنتجات الكوري و اللي بتنافس منتجات كتير جدًا معروفه من سنين و اللي بيميزها هو ان منتجاتها لطيفه جدًا علي الجلد مش بتأذيه ، تونر سنتلا ووتر من كوزركس هو واحد من افضل منتجاتها و مناسب جدًا للبشره الجافه الحساسه لانه خالي من الكحول و البارابين و بيحتوي علي اوراق السنتلا اللي بتهدّي الجلد بشكل كبير و بتقلل الاحمرار كمان ، ميزة الماركه دي ان منتجاتها غير مختبره علي الحيوانات لكن للاسف التونر ده سعره عالي شويه تقريبًا 450 جنيه و غير متوفر في مصر الا اونلاين بس.

2- ايتيود هاوس سون چون ريليف تونر / Etude House Soon Jung Relief Toner

Etude house soon jung toner
Etude house soon jung toner

المنتجات الكوريه من افضل المنتجات علي الاطلاق و حاليًا بقي يفضل استخدامها ناس كتير جدًا و التونر ده واحد من المنتجات اللي انصح بيها اصحاب البشره الجافه الحساسه و المتهيّجه لانه فعّال جدًا في تهدئة التهابات الجلد و الاحمرار الناتج عن التعرض للشمس او ازالة الشعر و غيره ، بيحسن ملمس البشره بشكل كبير جدًا و بيسيب الجلد رطب و شكله صحي جدًا ، بيحتوي علي الـ Madecasosside اللي بتقوّي الحاجز الواقي للجلد و دي ميزه مهمه جدًا ، مشكلته انه للاسف مش سهل تلاقيه في مصر بالاضافه لان سعره عالي شويه لكنه متاح اونلاين.

1- أڤين چينتل توننج لوشن / Avène Gentle Toning Lotion

Avene Toner
Avene Toner

زي ما اتعودنا من شركة أڤين انها بتحط مياه حراريه في كل منتجاتها فـ كمان التونر ده اول مكون فيه هو المياه الحراريه اللي بتهدّي و تلطّف الجلد بشكل كبير جدًا ، كمان التونر ده بيتميز بانه خالي من الكحول و البارابين و الصابون و الاهم انه بيعادل حموضة البشره و يرجّعها لطبيعتها ، له ريحه عطريه خفيفه لكنها مش بتسبب اي تهيج او تحسس للبشره فـ هو مناسب جدًا للبشره الحساسه كمان ، خالي من الزيوت يعني مستحيل يتسبب في سد مسام البشره و ضروري ترجيه قبل الاستخدام علشان المكونات الفعاله تندمج ببعضها ، سعره حوالي 210 جنيه مصري و حجمه 200 مل.

اترك تعليقاً

لن يتم نشر عنوان بريدك الإلكتروني.

مقالات ذات صلة

زر الذهاب إلى الأعلى
error: Content is protected !!