أفضل 10 تونر للبشره الدهنية

أفضل 10 تونر للبشره الدهنية
شارك هذه المقالة مع أصدقائك!

أفضل 10 تونر للبشره الدهنية . بنات كتير جدًا مش بتهتم انها تستخدم تونر وحتي متعرفش اهميته اوليه اصلًا مفروض نستخدمه رغم انه خطوه مهمه جدًا في العنايه بالبشره وهو الخطوه التانيه بعد الغسول وبيكون عباره عن سائل تمسحي بيه بشرتك ودوره الاول و الاساسي هو معادلة درجة حموضة البشره خصوصًا ان في الغالب الغسول بيتسبب انه يخلي وسط بشرتنا قاعدي و ده عكس طبيعتها اصلًا فـ التونر بيقدر يوازن حموضة البشره او الـ PH ، غير كده كمان هو بينضف البشره بعمق و ضروري استخدامه بعد يوم طويل او لما تمسحي الميك اب.

أفضل 10 تونر للبشره الدهنية
أفضل 10 تونر للبشره الدهنية

أهمية التونر للبشره الدهنيه

كمان التونر مهمته الكبيره هي انه قابض للمسام علشان كده ضروري تستخدميه لو بشرتك دهنيه لان البشره الدهنيه هي اكتر بشره معرّضه لمشكلة المسام الواسعه ، التونر مش بس مجرد سائل بينضف البشره لكن كل نوع بيحتوي علي مكونات فعاله فيه بتهدف لحل مشكله معينه زي ان انواع التونر الخاصه بالبشره الدهنيه بتكون غالبًا فيها أحماض مقشره زي حمض السالسيلك او حمض الجليكوليك و غيرهم كتير ، و بيكون الهدف من وجود المكونات دي هو تجديد خلايا البشره و الحد من افراز الدهون و كمان السيطره علي ظهور الحبوب.

أفضل 10 تونر للبشره الدهنيه

10- ثايرز ويتش هازل فيشال تونر / Thayers Witch Hazel Toner

Thayers Toner
Thayers Toner

تقريبًا ده اشهر تونر في العالم و اتعمل عليه ضجه كبيره جدًا و تقريبًا مفيش بنت مجربتوش او علي الاقل سمعت عنه و كان نفسها تجربه و يقال انه تونر المشاهير ، هو عباره عن مياه ورد عضويه بالاضافه الي خلاصة الصبار لكنه للأسف اقل من كل التوقعات هو مش مضر للبشره في اي شئ لكنه مش بينفعها برده بأي شئ ، ممكن لو بشرتك مفيهاش اي مشاكل تستخدميه و تكوني حطاه في التلاجه قبلها بحيث يدّي لبشرتك انتعاش و يقدر يقبض المسام.

9- أڤين كلينانس ميسلار ووتر / Avène Cleanance Micellar Water

Avene Micellar Water
Avene Micellar Water

الميسلار ووتر او مياه الميسلار دي موجوده في ماركات كتير و وظيفتها الاساسيه هي ازالة الميك اب و الشوائب من البشره علشان كده ناس كتير اوي بتفضّل استخدامها بدل التونر و في ناس تانيه بتقول ان اصلًا مش صح نسيب الميسلار ووتر علي بشرتنا و المفروض نغسلها لانها بتفضل تشتغل و تنشف الجلد ، و عمومًا لو انتي هتمشي بالمبدأ الاول و حابه تستخدميها فـ ميسلار ووتر أڤين ممتازه الحقيقه و بتنقي البشره جدًا و ميزتها انها مش بتسيب اي طبقه علي الجلد لكن شخصيًا مش بفضّل استخدام الميسلار ووتر كـ تونر علشان كده اعتبرتها في المرتبه التاسعه لو هنقيّمها كـ تونر ، سعرها 230 جنيه.

8- نوكس اكوابيلا بيوتي ريڤيلينج لوشن / Nuxe Aquabella Beauty-Revealing Essence-Lotion

Nuxe Toner
Nuxe Toner

تونر مناسب اكتر للبشره المختلطه عن الدهنيه و ده راجع لانه مش بيقلل افراز الدهون بصوره كبيره و لطيف جدًا علي الجلد ، غير كده كمان هو فيه مواد مرطبه زي حمض الهيالورونيك المعروف انه بيرجع الرطوبه للجلد مره تانيه لكنه كمان بيحتوي علي مكونات بتنظم افراز الدهون و بتحسن ملمس البشره و مظهرها كمان ، متوفر في اي صيدليه كبيره لكن سعره عالي حوالي 350 جنيه و حجمه 200 مل.

7- حياه سيباكلار تونيك لوشن / Hayah Sebaclar Tonic Lotion

Sebaclar Toner
Sebaclar Toner

بنات كتير بتدور طول الوقت علي تونر سعره رخيص لكن المشكله ان صعب جدًا تلاقي تونر رخيص بس التونر ده سعره كويس جدًا حوالي 120 جنيه و كمان حجمه كبير ، مناسب جدًا للبشره الدهنيه لانه بيقلل افراز الدهون بشكل كبير و كمان بيساعد في تصغير حجم المسام مع الاستخدام المنتظم لكنه بينشف البشره شويه ، تقدري تلاقيه في كل الصيدليات.

6- كوزركس Aha Bha كلريفاينج تونر / Cosrx Aha Bha Clarifying Tone

Cosrx Toner
Cosrx Toner


أقوي انواع التونر للبشره الدهنيه هي اللي بيكون مكوناتها الاساسيه أحماض لان البشره الدهنيه صديقه للاحماض جدًا و التونر ده عظيم لانه بيحتوي علي أحماض فواكه و دي من أقوي الأحماض علي الاطلاق و بتساعد بشكل كبير جدًا في تجديد خلايا الجلد و التخلص من الحبوب و كمان التصبغات ، يمكن مشكلته انه للاسف متوفر اونلاين فقط في مصر و سعره عالي حوالي 450 جنيه مصري.

5- فارماسيرز نورماليزنج تونر / Pharmaceris NORMALIZING TONER

Pharmaceris toner
Pharmaceris toner


لو بتدوري علي منتجات اسعارها متوسطه و كمان فاعليتها متوسطه فـ تقدري تستخدمي منتجات فارماسيرز لانها هتحققلك الهدفين دول و التونر ده مخصص للبشره الدهنيه و ان كان مش بيوازن افراز الدهون بصوره كبيره لكنه مقارنًة بسعره فـ هو كويس جدًا ، بينضف البشره بعمق و فعلًا بيسحب منها اي اتربه او دهون متراكمه او حتي بقايا ميك اب ، سعره حوالي 150 جنيه في الصيدليات الكبيره في مصر.

4- ڤيشي بيوريتيه ثيرمال 3×1 كلينسنج مسيلار سوليوشن / Vichy Purete Thermal 3 in 1 cleansing micellar solution

Vichy Toner
Vichy Toner


التونر ده من ڤيشي مش مجرد تونر هو بيوعد بتنظيف عميق للبشره و كمان مزيل لـ مكياج العيون و برده تونر و بالفعل هو بينضف البشره كويس جدًا و بيديها انتعاش رهيب بالاضافه لانه مش بيحسس البشره نهائي بالعكس بيهدّيها جدًا و بيقلل اي احمرار فيها خاصةً بعد التعرض للشمس او ازالة شعر الوجه ، تقدري تمسحي بيه ميك اب العيون في حالة انه مش مقاوم للمياه بدون ما يحسس عينك لو دخل فيها ، مفيهوش اي مواد فعاله تهدف لمشاكل البشره الدهنيه لكنه بيحد من ظهور الحبوب ، حجمه 200 مل و سعره 220 جنيه تقريبًا و متوفر في اي صيدليه كبيره.

3- ذا بادي شوب تي تري سكين كليرينج تونر / Tea Tree Skin Clearing Mattifying Toner

The Body Shop Toner
The Body Shop Toner

ذا بادي شوب ماركه غير طبيه لكنها اثبتت كفاءة منتجاتها من سنين كتيره جدًا و منها لاين شجرة الشاي الخاص بالبشره الدهنيه و اللي يعتبر أفضل منتجاتها و اعلاها مبيعًا ، و التونر ده بخلاصة شجرة الشاي من افضل التونرات اللي ممكن تجربيها لو بشرتك دهنيه لان زيت شجرة الشاي معروف بقدرته العاليه علي التخلص من الحبوب و الدهون الزياده في البشره ، بتستخدميه علي قطنه و ضروري ترجيه قبل الاستخدام علشان يندمج مع بعضه و تقدري تستفيدي منه ، مش متوفر غير في فروع ذا بادي شوب الموجوده في مولات مصر الكبيره للأسف و سعره حوالي 350 جنيه.

2- بيكسي جلو تونيك 5% جليكوليك اسيد / Pixi Glow Tonic 5% Glycolic Acid

Pixi Toner
Pixi Toner

تونر عليه ضجه كبيره و بالفعل يستحقها لانه تونر خالي من الكحول و بيحتوي علي 5% من حمض الجليكوليك اللي يعتبر من اقوي أحماض الفواكه اللي بتساعد في تجديد خلايا الجلد و اعطاؤه النضاره و اللمعان الصحي ، بينصح بالتدرج في استخدامه بمعني انك في البدايه تستخدميه مرتين في الاسبوع و بعد كده تقدري تستخدميه يوم و يوم و في النهايه لما بشرتك تتعود عليه ممكن تستخدميه مرتين في اليوم عادي ، بيحتوي علي الصبار لتلطيف الجلد و ممكن تستخدميه قبل الماب و بعد ازالته ، مشكلته انه للاسف غير متوفر في مصر الا اونلاين و سعره عالي حوالي 400 جنيه لحجم 100 مل لكنه بره مصر متوفر بسهوله و ارخص كمان.

1- لاروش بوزاي ايفاكلار استرينجينت لوشن / La Roche Posay Effaclar Astringent Lotion

La roche posay toner
La roche posay toner

في اسباب كتير تخلينا نعتبر التونر ده أفضل تونر للبشره الدهنيه متوفر في مصر اولها فعلًا هي نقطة التوفر لانك سهل تلاقيه في اي صيدليه كبيره ، كمان هو تونر بيحتوي علي نسبه عاليه من المياه الحراريه اللي بتساعد بدورها في تلطيف الجلد بالاضافه لحمض السالسليك المعروف بانه صديق ممتاز للبشره الدهنيه و ده لانه بيدوب اي اتربه او اوساخ او دهون زياده متراكمه في المسام و بالتالي بيقلل من فرصة ظهور الحبوب في البشره ، بيحتوي علي الكحول و ده ممكن يسبب جفاف في البشره فـ الافضل منستخدموش بشكل يومي ، سعره 225 جنيه و حجمه 200 مل.

‫0 تعليق

اترك تعليقاً