أفضل 10 طرق لتحسين الصحه النفسيه . للاسف مش كتير مننا بيهتم بصحته النفسيه و لا حتي بنهتم بالصحه النفسيه للناس اللي بنحبّهم و بنفكر في انه طول ما الشخص سليم ” جسديًا ” يبقي هو مش تعبان و ده تفكير غلط تمامًا ، لان حتي منظمة الصحه العالميه قالت ان ” الصحه هي حاله من اكتمال السلامه البدنيه و النفسيه معًا، لا مجرد انعدام المرض او العجز ” ، و ده معناه ان طول ما صحتك النفسيه غير سليمه يبقي صحتك العامه برده غير سليمه ، علشان كده لازم تحاول تحسين حالتك النفسيه عن طريق عادات معينه هتساعدك بنسبه – و ان كانت بسيطه – بس هتقدر تساعدك و هنتكلم معاك دلوقتي عن أفضل 10 طرق لتحسين الصحه النفسيه.
أفضل 10 طرق لتحسين الصحه النفسيه
أفضل 10 طرق لتحسين الصحه النفسيه . في امراض نفسيه كتير للاسف مش من السهل حلها او علاجها بنفسنا و الطريق الوحيد اللي ممكن نمشي فيه علشان نعالج الامراض دي هي اللجوء لدكتور نفسي مختص و الاكتئاب من الامراض دي لانه مش حاله عابره زي ما ناس كتير متخيله ، الاكتئاب مرض محتاج علاج مع مختص و فيه زيه كتير من الامراض النفسيه ، و نصايحنا ليكم هي مش علاج لامراض نفسيه مزمنه و لكن محاوله لتعزيز الحاله النفسيه اللي كتير بتضطرب نتيجه لضغوطات الحياه.
10- توقع الأفضل
كتير من الناس بتخاف تتفائل و دايمًا عايشين في شكوي ملهاش نهايه سواء شكوي من اللي فات او اللي جاي او حتي من اللي عايشين فيه و سواء كانت الشكوي دي حقيقه او كلها زيف ، في النهايه الشكوي المستمره مش هتحل اي مشكله بالعكس هتزود طاقتك السلبيه و شعورك ان كل ما هو قادم هيكون سئ و بس ، فـ الصح انك تتوقع ان الجاي دايمًا هيكون احسن و اعتبرها عباده كمان و هي حسن الظن بالله ، ياريت تفكّر بايجابيه.
9- تقبل الأخطاء و العيوب الشخصيه
كلنا بنغلط و كلنا مليانين عيوب و يقينك بان العيوب دي امر طبيعي هيساعدك توصل للسلام الداخلي و تحب نفسك ، بعض الناس اللي بتغلط بتجلد نفسها مع كل غلطه و كأنها اتخلقت علشان بس تعمل الصح و بعض الناس اللي بتغلط بتكابر و تشوف ان الغلط ملوش مكان في حياتها و في الحاله الاولي الشخص عمره ما هيقدر يحب نفسه و هيشوفها طول الوقت غلط، و في الحاله التانيه الشخص هيشوف نفسه طول الوقت صح و مستحيل يطور من نفسه علشان كده ضروري تقبل عيوبك.
8- تعلم مهارات جديده
طول ما عقلنا في حالة تفكير و تعلّم هيفضل شغال و بيفكر في اتجاهات معينه مش هياخدنا لنواحي سلبيه و لافكار مليانه بالتشاؤم و الحنين للي فات علشان كده دايمًا اشغل عقلك و في الوقت اللي بتضيّعه في التفكير بتشاؤم و بتتفرج علي غيرك و بس استغله في تعلم لغه جديده مثلًا او مهاره جديده او حتي احترف رياضه معينه، المهم متسيبش عقلك يسوقك و يسوق صحتك النفسيه.
7- كسر الروتين
كتير مننا بيحس بالامان و الاستقرار لما يمارس الانشطه و العادات الخاصه بيه بشكل متكرر كل يوم و ده ان كان – لوقت معين – فعلا صحيح و بيعزز الشعور بالاستقرار عند اغلبنا لكن هنيجي في وقت و هنحتاج نحس ان في شئ جديد حتي و ان كان شئ بسيط زي تغيير اماكن العفش في البيت مثلًا او تغيير استايل لبس معين اتعودنا عليه و هكذا ، و كمان كسر الروتين ده ممكن جدًا يكون عن طريق ممارسة رياضه معينه و نبقي حققنا هدفين في وقت واحد.
6- تخصيص وقت لنفسك
في الوقت اللي كلنا محتاجين نحس فيه بالدفء الاسري و وجود الاصدقاء من حوالينا احنا كمان لازم كل يوم نخصص وقت معين يبقي لنفسنا و بس نفصل فيه عن اي ضغط و اي مسؤوليات ، و طبعًا ضروري نوضّح ان وقتك علي السوشال ميديا هو للاسف مش وقت مخصص لنفسك حتي و ان كنت قاعد لوحدك ، وقت لنفسك يعني وقت تقرأ فيه كتاب او تشرب فيه فنجان قهوه مع مزيكا هاديه او حتي تتمشي لوحدك و انت بتاكل شوكولاته.
5- المساهمه في الاعمال الخيريه
فكرة انك تساعد شخص او مجموعه في شئ معين بدون انتظار اي مقابل دي من اهم الامور اللي بتحسن من حالتك النفسيه و بتعزز شعورك بانك شخص يستحق الافضل ، و مش بس المساهمه في الاعمال الخيريه و لكن مبادرتك للسلام مع اي شخص و ان كان عن طريق الابتسامه او قول كلمه طيبه هتساعد في دعم حالتك النفسيه بشكل كبير ، يعني انت مش مضطر تبقي غني و معاك فلوس علشان تقدم شعور طيب للغير و بالتالي ينعكس عليك.
4- ممارسة الرياضه باستمرار
الرياضه مش بس بتحسن الحاله النفسيه لا هي كمان بتساهم في علاج امراض كتير جدًا النفسيه منها و الجسديه و ممارسة الرياضه بتفرز هرمون السعاده في الجسم و بالتالي بيكون الشخص مقبل علي الحياه اكتر ، و المقصود بالرياضه مش ممارسة الرياضات العنيفه ولا حتي انك تشترك في چيم و لكن الرياضه في ابسط صورها هتساعدك كتير في تحسين حالتك النفسيه حتي و ان كانت الرياضه اللي هتمارسها هي المشي فـ نصيحتنا ليك تخصص جزء من يومك تمارس فيه رياضه و لو وقت قصير و رياضه بسيطه.
3- النوم الجيد
النوم الصحي له قواعد و مش اي شخص نايم يبقي قدر ينام نوم صحي يعني بالتأكيد لو انت شخص بينام بالنهار و بيصحي بالليل ده عمره ما هيكون نوم صحي حتي لو نمت عدد ساعات كافيه ، و لو انت شخص بينام عدد ساعات قليل او زياده عن اللزوم بالتاکيد نومك غير صحي و في كلتا الحالتين مش هتقدر تكون شخص نشيط قادر ينجز انشطه كتير خلال يومه علشان كده لو انت حاسس بأرق مزمن ضروري تتابع مع متخصص في امراض النوم و لو انت شخص نومه غير صحي ” بكامل ارادته ” خد قرارك و ظبط نومك و حالتك النفسيه كمان.
2- تقوية العلاقات الاجتماعيه
قال تعالي ﴿ يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ ﴾ [الحجرات:13] و يقول ابن خلدون ” إن الانسان اجتماعي بطبعه ” ، و ده بيوضح ان اتجاهات كتير علي رأسهم الدين الاسلامي بتقر بإن الانسان طبيعته الصحيحه و الصحيه هي وجوده في جماعات و علاقات علشان كده ضروري جدًا تتواصل مع اسرتك و اصدقائك بشكل مستمر و تقضّي معاهم وقت بجوده ، يعني مش بس تقعد معاهم لا تقعد معاهم بتركيز و بكل حواسك بعيدًا عن السوشال ميديا اللي هدّت و لسه بتهِد علاقات كتير.
1- الاهتمام بالصحه الجسديه
الصحه النفسيه و الصحه الجسديه وجهان لعمله واحده و ده باختصار شديد معناه انه مستحيل تلاقي شخص صحته الجسديه في حالة تدهور و صحته النفسيه سليمه و العكس صحيح ، و علشان تحسن من حالتك النفسيه لازم تهتم بمعالجة اي امراض بتطاردك و انك تسمع صوت جسمك و لو حسيت بأي اعراض سيئه تتوجه و بسرعه لاقرب دكتور مختص ، و طبعًا مش هننسي الدور الكبير للنظام الغذائي الصحي في التحسين من صحتنا سواء النفسيه او الجسديه.
