أفضل 10 غسولات للبشره الجافه

أفضل 10 غسولات للبشره الجافه
شارك هذه المقالة مع أصدقائك!
أفضل 10 غسولات للبشره الجافه
أفضل 10 غسولات للبشره الجافه

أفضل 10 غسولات للبشره الجافه . البشره الجافه هي اقل بشره بتفرز دهون و بالتالي بتكون اكتر عرضه للالتهاب و الحساسيه و الاحمرار و فصل الشتا بالنسبه لاصحاب البشره الجافه هو اسوأ فتره في السنه لان فيه بشرتهم بتتعرض لمشاكل كتير جدًا بسبب انخفاض درجة الحراره و برودة الجو زي التشققات و الاحساس بالشد و عدم راحة الجلد ، و اكتر ازمه بيمر بيها أصحاب البشره الجافه انهم مش بيلاقوا غسول مناسب يقدر ينضف بشرتهم بشكل خفيف و كمان مينشفهاش و هو ده اللي هنتكلم فيه النهارده ، هرشحلكم أفضل 10 غسولات للبشره الجافه.

حل مشاكل البشره الجافه

دايمًا اصحاب البشره الدهنيه بيحلموا تكون بشرتهم جافه و لو لـ يوم واحد و ده للاسف لانهم ميعرفوش المعاناه اللي بيمر بيها اصحاب البشره الجافه و المشاكل الكتير اللي بتتعرضلها ده غير ان البشره الجافه بتكون معرّضه لظهور علامات تقدم السن بسرعه و ده لانها غير مرنه لكن الاهتمام بترطيبها هيساعدك جدًا تحافظي علي شبابها و نضارتها اطول فتره ممكنه ، و طبعًا الغسول و المرطب المناسبين لبشرتك مينفعش تستغني عنهم و زي ما كلمناكم في موضوع فات عن مرطبات البشره الجافه المره دي هنتكلم عن الغسولات الخاصه بيها.

أفضل 10 غسولات للبشره الجافه

غسولات البشره الجافه مش شرط تكون بترطّب الجلد لان الغسول وظيفته الاساسيه هي التنظيف و خطوة الترطيب دي مهمة المرطب مش الغسول بالدرجه الاولي ، المهم في اختيارك الغسول كـ بشره جافه هو انه ميسببش جفاف للجلد او تحسس و في عوامل كتير مفروض تختاري الغسول لبشرتك الجافه علي اساسها زي انه يكون :

  • خالي من الصابون و السلفات و البارابين و الكحول / Soap , Sulphate , Paraben and alcohol free.
  • ذو قاعد زيتيه او كريميه / Oily – Creamy Based.
  • يقوي الحاجز الواقي للجلد / Strengthen Skin Barrier.
  • يستعيد الطبقه الدهنيه للجلد / Restores Skin Lipids.

10- سيتافيل چنتل سكين / Cetaphil Gentle Skin Cleanser

غسول سيتافيل
غسول سيتافيل

غسول سيتافيل خفيف و لطيف جدًا علي البشره مكوناته مش قويه لكنها مناسبه للبشره الجافه و بتقلل من الاحساس المزعج اللي بتتعرض ليه البشره الجافه و كمان هو Non-Comedogenic يعني مش هيسد المسام ، مشكلته انه غير متوفر في مصر و كمان بيحتوي علي السلفات و البارابين فـ هو اقلهم في الجوده.

9- غسول دوڤ بيوتي مويستشر / Dove Beauty Moisture Face Wash

غسول دوف
غسول دوف

غسول ممتاز لاصحاب البشره الجافه بينضفها بعمق علي الرغم من ان غالبًا غسولات البشره الجافه بتكون ضعيفه في قدرتها علي التنضيف ، غير كده كمان هو بيرطّب الجلد و بيخليه شكله نضر اكتر و فيه لمعه ، لكن مشكلته هو انه غير متوفر في مصر للاسف و كمان زيه زي كل منتجات دوف بيحتوي علي نسبه كبيره من العطور فـ مش مناسب للبشره الحساسه.

8- كليو الترا مويتشر ريتش چل / Cleo Ultra Moisture Rich Gel

غسول كليو
غسول كليو

غسول كليو للبشره الجافه قوامه چل و ده مش افضل قوام لغسولات البشره الجافه لكنه بينضف البشره كويس و بينعم سطحها و بيزودها بالترطيب اللي محتاجاه و ده بفضل مكوناته المتميزه زي زبدة الشيا و زيت الجوجوبا و البانثينول و كمان خلاصة الصبار و النياسيناميد اللي بيقوي حاجز البشره ، ميزة منتجات كليو كمان انها غير مختبره علي الحيوانات و خاليه من البارابين و برده Non-Comedogenic يعني مش بيسد مسام البشره.

7- غسول نيتروچينا هيدرو بوست ووتر چل / Neutrogena Hydro Boost Water Gel Cleanser

غسول نيتروجينا
غسول نيتروجينا

منتجات نيتروجينا برده منتجات غير طبيه فيها نسبة عطور لكنها مناسب للبشرات الغير حساسه ، و الغسول ده من نيتروجينا موجود في السوق من فتره و عمل ضجه كبيره اوي و هو فعلًا متميز لانه بيحتوي علي الهايلورونيك اسيد اللي بيعوض البشره بالرطوبه المفقوده و كمان حجمه مناسب لفئه كبيره من البنات و سهل تلاقيه في مصر.

6- ڤيشي بيوريتيه ثيرمال جل / Vichy Puretè Thermale Gel Cleanser

غسول فيشي
غسول فيشي

غسول ممتاز بيتكون من ڤيتامين B3 اللي بيساعد في اعادة بناء جدار البشره و كمان بيحتوي علي 80% من مياه ڤيشي الحراريه ، بيساعد جدًا في التخلص من احساس الجفاف و البشره المشودوده كمان بيتميز بخاصية ازالة المكياج يعني هيساعدك في تنظيف بشرتك بصوره كبيره ، و من اهم المزايا في الغسول ده انه بيحتوي علي خلاصة بذور المورينجا المعروفه بتنقيتها للمياه الملوثه و تقليل الجزيئات الدقيقه الملوثه علي البشره.

5- ماكرو توبي چينت ديليكيت فوم / Macro Topi Gent Delicate Foam

غسول توبي جينت
غسول توبي جينت

غسول توپي چينت ديليكيت جودته كويسه و في نفس الوقت سعره لطيف جدًا و ده راجع لانه غسول محلي الصنع مش مستورد ، الغسول ده بيوفر للبشره الجافه الشعور بالراحه عن طريق تركيبته الممتازه اللي موجود فيها بانثينول و عسل و كاموميل و الانتوين و دي كلها مواد معروفه بقدرتها علي ترطيب الجلد و تلطيفه و كمان هو غسول علي هيئة فوم مش چل يعني مستحيل يجفف الجلد ، الغسول ده خالي من السلفات و الصوديوم و الكحول و ده اثبات قوي جدًا علي انه استحاله يجفف الجلد او يرهقه.

4- غسول يورياچ زيموس چنتل / Uriage Xèmose Gentle Cleanser

غسول يورياج
غسول يورياج

غسول ماركة يورياچ الفرنسيه غني جدًا بالمياه الحراريه اللي اتكلمنا عنها كتير و عن فوايدها العظيمه في تلطيف الجلد و تهدئة الاحمرار و الالتهاب ، و فعلًا الغسول ده قوي جدًا للبشره الجافه لانه خالي من الصابون و البارابين و حتي العطور و تقدري بكل سهوله تستخدميه في فترة تهيج بشرتك او الاحساس بالحكه ، بيحتوي كمان علي بعض من المعادن الطبيعيه اللي بنحتاجها لتقوية و تعزيز مناعة الجلد بالاضافه لانه بيوازن درجة حموضة البشره و ممكن تستخدميه للجسم كمان.

3- اڤين تريكسيرا إيمولينت چل / Avène Trixera Emollient Cleansing Gel

غسول افين
غسول افين

غسول اڤين تريكسيرا له مميزات كتير اوي للبشره الجافه و الحساسه كمان زي انه خالي من العطور اللي بتسبب تهيج و حكه للبشره و خالي من الصابون اللي بيجفف البشره بصوره كبيره ، مناسب للاطفال و الرضع و الكبار كمان و زي ما اتفقنا ان كل منتجات اڤين بتضم في تكوينها المياه الحراريه اللي بتهدي الجلد و تريحه بدرجه عاليه ، بعد الانتظام علي استخدامه هتلاقي فرق كبير في رطوبة بشرتك و كمان ملمسها.

2- لاروش بوزاي ليپيكار / La Roche Posay Lipikar

غسول لاروش بوزاي
غسول لاروش بوزاي

غسول كريمي مناسب جدًا لاصحاب البشره الجافه و كمان للبشره الحساسه او المصابه بالاكزيما او الورديه ، بيحتوي علي نسبه كبيره من مياه لاروش بوزاي الحراريه اللي بتلطّف الجلد و مناسب كمان للجسم في حالة جفاف الجلد او التحسس من العطور لانه خالي من العطور و الكحول ، و حجمه كبير مقارنةً بسعره فـ هتقدري تستخدميه فتره طويله.

1- بيوديرما اتوديرم بي بي چل / Bioderma Atoderm PP Gel

غسول بيوديرما
غسول بيوديرما

لاين البشره الجافه من بايوديرما بيضم مجموعه كبيره من افضل المنتجات للبشره الجافه علي الاطلاق و الغسول ده بيحتوي علي تركيبه متميزه بتساعد الجلد يحافظ علي مرونته و الحاجز الواقي له كمان و اهم مكون فيه هو النياسيناميد اللي بيساعد بشكل كبير في استعادة قوة حاجز الجلد حتي و لو كان ضعيف ، بالاضافه لان الغسول ده كمان بيهدي و يلطف الجلد بصوره رائعه و كمان مش صعب في الغسل ابدًا و واحده من اهم مميزاته انه مناسب طبعًا لو بشرتك حساسه او فيها اي التهابات بالفعل.

‫0 تعليق

اترك تعليقاً