أفضل 10 أنواع غسول للبشرة الدهنية

أفضل 10 أنواع غسول للبشرة الدهنية، البشره الدهنيه دايمًا معرّضه لمشاكل كتير اولهم مشكلة ظهور الحبوب خاصًة الحبوب تحت الجلد و المشكله دي بتكون نتيجة الافراز الزياده في دهون البشره اللي بتتراكم و تسبب ظهور الحبوب ، عشان كده دايمًا اصحاب البشره الدهنيه محتاجين يستخدموا غسول يخلصهم من الدهون الزياده في البشره

مع الاهتمام بخطوة الترطيب طبعًا بعد استخدام الغسول لان غسولات البشره الدهنيه في الغالب بتكون علي هيئة Gel و بالتالي بتسبب جفاف في الجلد ، و انا في الموضوع ده هرشحلكم أفضل 10 غسولات للبشره الدهنيه.

أفضل 10 أنواع غسول للبشرة الدهنية

زي ما قولنا ان استخدام غسول مخصص للبشره الدهنيه لتنظيم افراز الدهون خطوه اساسيه لا غني عنها في الاهتمام بالبشره. لكن لازم نراعي ان الافراط في استخدام الغسولات دي مش هيحسن البشره زي ما ناس كتير معتقده ده بالعكس هيتسبب في مشاكل كتير اوي زي تدمير الحاجز الواقي للبشره

و تحفيز البشره علي افراز دهون اكتر علشان تعوّض الدهون الكتير اللي فقدتها. فـ لازم كلنا نبقي عارفين ان استخدام الغسول عامًة بيكون مرتين في اليوم او 3 كحد اقصي في حالة الاحتياج لاستخدام الغسول في نص اليوم في فصل الصيف.

غسولات البشره الدهنيه عادًة بتكون في صورة Gel و ده لانه بينضف البشره بشكل اعمق. و كمان بتحتوي علي مواد معينه بتساعد في تقشير طبقات الجلد السطحيه

و الحد من افراز الدهون زي حمض الساليسيليك و زيت شجرة الشاي و بعض من احماض الفواكه زي حمض الجليكوليك. بعض من الغسولات دي بيقدر يتناسب مع طبيعة البشره الحساسه و بعضها لا و انتي تقدري تختاري الانسب لبشرتك حسب طبيعتها و كمان حسب ميزانيتك.

أفضل 10 أنواع غسول للبشرة الدهنية

خطوة تنظيف البشره الدهنيه باستخدام غسول مناسب مش بس بتساعدنا في التخلص من الدهون الزياده. هي كمان بتساعد البشره انها تجدد خلاياها. و بالتالي يكون ملمسها ناعم اكتر و كمان شكلها نضر و صحي ، أفضل 10 غسولات للبشره الدهنيه باختلاف اسعارهم و كفائتهم هما :

10- غسول كليو كلير / Cleo Clear Cleansing Gel

كليو من الماركات المصريه اللي اثبتت وجودها في الفتره الاخيره. و اللي بتتميز بعدم تجربة منتجاتها علي الحيوانات و وجود مجموعه رائعه من المواد الفعاله فيها

الغسول ده عباره عن تركيبه ممتازه من المواد دي مشكلته ممكن تكون في الجفاف الشديد اللي بيسببه للجلد. كمان العبوه الموجود فيها الغسول للاسف صعبة الفتح و بتهدر كميه كبيره من المنتج.

السعر : 170 جنيه مصري / السعه : 200 مل.

---

9- غسول سينوبار سكين كلينسر / Synobar Skin Cleanser

من الغسولات المصريه الفعاله جدًا في استهداف مشاكل البشره الدهنيه. و بيحتوي علي مواد رائعه بتساعد في التخلص من الدهون الزياده في البشره

لكن مشكلته انه بيسبب جفاف شديد في الجلد و مش بيساهم بصوره واضحه في التخلص من الحبوب. لكن مقارنًة بسعره نقدر نعتبره من افضل 10 غسولات للبشره الدهنيه.

السعر : 70 جنيه مصري ، السعه : 250 مل.

---

8- غسول ناتري / Natry Foaming Cleanser

ناتري من شركة ماكرو المصريه يعتبر برده واحد من اقوي غسولات البشره الدهنيه. و اللي بيحتوي علي خلاصات طبيعيه بتساعد في تنظيم افراز دهون البشره و التخلص من البكتيريا

سعره كمان رخيص جدًا و في متناول الجميع و من اهم مميزاته انه بيعادل درجة حموضة البشره ( 5.5 ). يعتبر أرخص غسول للبشرة الدهنية و تقدري تجربي منه الصابونه لو حاسه ان سعره غالي بالنسبالك.

السعر / 70 جنيه مصري ، السعه /250 مل.

---

7- فارماسيرز تي زون كلينسينج چل / Pharmaceris T-Zone Oily Skin Cleansing Gel

ماركة فارماسيرز بتتميز باسعارها المتوسطه و ان منتجاتها خاليه من السلفات و البارابين و الكحول. فـ بالتالي بتكون مناسبه للبشره الحساسه بدون ما تسببلها اي تهيج او احمرار و مناسب للبشره الدهنيه الحساسة

و الغسول ده واحد من المنتجات دي و بيتميز بوجود حمض المانداليك و حمض الساليسيليك فيه. و قدرته انه يقضي علي البكتريا اللي ممكن تسبب حبوب فيما بعد ، و تقدري تستخدمي منه النوع الفوم لو بشرتك مختلطه مش دهنيه .

السعر : 159 جنيه مصري / السعه : 150 مل.

---

6- غسول لاروش بوزاي ايفاكلار چل / La Roche Posay Effaclar Gel

لاين ايفاكلار من لاروش بوزاي مخصص للبشره الدهنيه بجميع مشاكلها و الغسول ده واحد من اشهر غسولات البشره الدهنيه علي مستوي العالم. و بالفعل هو واحد من افضل الغسولات لانه بيحتوي علي حمض الساليسيليك و كمان خالي من الصابون فـ مناسب جدًا للبشره الحساسه

لكنه للاسف تأثيره علي الحبوب ضعيف و مش بس علي الحبوب هو كمان في السيطره علي الدهون تأثيره مش قوي. لكنه اختيار كويس جدًا لو بشرتك مختلطه.

السعر : 210 جنيه مصري / السعه : 200 مل.

---

5- غسول يورياچ هيسياك / Uriage Hyséac Cleansing Gel

الغسول ده كمان من غسولات البشره الدهنيه اللي في صورة Gel لكنه مش بيجفف البشره نهائي. و بيساعد في التخلص من الرؤوس البيضا و السوده و حجمه مناسب جدًا

و بالتالي تقدري تستخدميه فتره طويله ، من اهم مميزاته انه خالي من الصابون و كمان بيحتوي علي مياه يورياچ الحراريه اللي ليها قدره عاليه جدًا علي تهدئة الجلد، و تلطيفه يعني لو بشرتك حساسه تقدري تستخدميه بأمان تام.

السعر : 200 جنيه مصري / السعه : 150 مل.

---

4- غسول ڤيشي نورماديرم / Vichy Normaderm Cleansing Gel

ڤيشي من اقوي الماركات الفرنسيه اللي كلنا بنحب نجرب منتجاتها و الغسول ده واحد من اقوي منتجات ڤيشي ، هو چل منظف مخصص للبشره الدهنيه بيتميز بوجود حمض الساليسيليك و حمض الجليكوليك فيه و ده يعني تقشير سطحي للبشره و بالتالي التقليل من وجود الرؤوس السوده

و كمان مساعدة البشره انها تظهر بشكل حيوي اكتر ، اللي بيميز الغسول ده هو انه مش بيسبب جفاف للجلد ابداً في حين ان كل الغسولات الچل تقريبًا بتجفف الجلد

كمان هو بيمسح الميك اب بنسبه ممتازه لكن للاسف ملوش اي تأثير واضح او ملموس في السيطره علي الحبوب.

السعر : 229 جنيه مصري / السعه : 150 مل.

---

3- غسول ماكرو توبي چينت سيبيم / Macro Topi Gent Sebum

غسول رائع من شركه مصريه علاجيه و هي شركة ماكرو اللي تقريبًا مفيش بنت مجرّبتش منهم منتج واحد علي الاقل ، و الغسول ده فوق الرائع و ده لانه بيحتوي علي تركيبه متميزه من الاحماض اللي بتجدد خلايا البشره و تقلل من الافراز الزياده للدهون زي حمض الساليسيليك و حمض الجليكوليك ،

و كمان فيه ڤيتامين سي و خلاصة الشاي الاخضر للحفاظ علي نضارة الجلد و زيت شجرة الشاي و زيت الزعتر و اللي مهمتهم الاساسيه القضاء علي البكتريا المسببه للحبوب

مشكلته بس انه غير مناسب لو البشره حساسه و كمان بينشف الجلد شويه و لكن نقدر نحل مشكلة الجفاف باستخدام مرطب مناسب.

السعر : 110 جنيه مصري ، السعه : 200 مل.

---

2- غسول ايزيس فارما تين ديرم جل / Isis Pharma Teen Derm Gel Sensitive

غسول ايزيس فارما الجل مناسب جدًا للبشره الدهنيه الحساسه و كمان هو Non-Comedogenic يعني مش بيتسبب ابدًا في سد مسام البشره ، كمان هو بيقدر يوازن درجة حموضة البشره

و من اهم مميزاته ان سعره متوسط و فئه كبيره من البنات تقدر تشتريه و طبعًا مختبر من اطباء الجلديه ، بيحتوي علي الزنك اللي بيساعد في تنئيم افراز الدهون و انه يطفي لمعة البشره الدهنيه.

السعر : 169 جنيه مصري ، السعه : 200 مل.

---

1- غسول أڤين كلينانس چل / Avène Cleanance Gel

زي ما قولتلكم في المواضيع اللي فاتت انا من عشاق ماركة اڤين بشكل شخصي و ده لانها اهتمت بالبشره من كل النواحي و اهتمت كمان بالبشره الحساسه

و الغسول ده افضل غسول علي الاطلاق للبشره الدهنيه لانه مش بس بينظم افراز الدهون في البشره هو كمان بيقلل جدًا من الحبوب الموجوده في البشره بالفعل و ده بفضل وجود حمض الساليسيليك في تركيبته

و كمان حمض السيتريك اللي بيجدد خلايا البشره ، غير كده كمان هو خالي من العطور و الصابون و بيحتوي علي مياه اڤين الحراريه اللي بتلطف الجلد و تهدّيه و بالتالي هو مناسب جدًا للبشره الحساسه.

السعر : 199 جنيه مصري ، السعه : 200 مل.

---

أفضل 10 أنواع سكراب للبشرة الدهنية