صحة وجمال

أفضل 10 غسولات للبشره المختلطه

البشره المختلطه دايمًا مظلومه في المنتجات المناسبه ليها و كمان كتير من البنات مبيقدروش يحددوا نوع بشرتهم اذا كانت جافه او دهنيه او مختلطه رغم ان التعرف علي البشره المختلطه سهل جدًا و ده لانها بتجمع بين نوعين بشره مع بعض ، و بتكون فيها منطقة الخدود جافه او عاديه و منطقة الجبهه و الدقن و الانف ” او ما يعرف بالـ T-Zone ” دهنيه و احنا قررنا اننا في المقاله دي هنساعدك تستخدمي الغسولات المناسبه ليكي و هنقولك أفضل 10 غسولات للبشره المختلطه و اللي تقدري تختاري منهم المناسب لـ ميزانيتك.

أفضل 10 غسولات للبشره المختلطه
أفضل 10 غسولات للبشره المختلطه

مشاكل البشره المختلطه

البشره المختلطه زي ما قولنا بيكون فيها افراز زياده للدهون في اماكن معينه بس من البشره و باقي اجزاء البشره جافه علشان كده دايمًا بتعاني من مشاكل زي الحبوب و الرؤوس السوده في منطقة الـ T-Zone و مشاكل زي الجفاف و القشور في منطقة الخدين، و اكبر مشكله بتواجه اصحاب البشره المختلطه هي اختيار المنتجات المناسبه اللي تنظم افراز الدهون بدون ما تجفف البشره و لكن بكل سهوله تقدري تستخدمي منتجات مخصصه للبشره الجافه في حالة ان بشرتك مايله اكتر للجفاف او منتجات مخصصه للبشره الدهنيه في حالة ان بشرتك مايله اكتر الدهنيه.

أفضل 10 غسولات للبشره المختلطه

10- غسول هيمالايا للتنقيه بعشبة النيم / Himalay Purifying Neem Face Wash

Himalaya Cleanser
Himalaya Cleanser

غسول هيمالايا بعشبة النيم و الكركم غسول سعره رخيص ( 60 جنيه ) و فئه كبيره من البنات تقدر تشتريه و هو فعلًا غسول لطيف جدًا للبشره المختلطه و كمان الدهنيه لكن بشرط تكون البشره غير حساسه لانه بيحتوي علي نسبه من العطور ممكن تسبب تحسس لو البشره حساسه ، من اكبر مميزاته انه بيقلل الرؤوس السوده بشكل كبير لكن للاسف مشكلته انه بيجفف البشره بشكل كبير فـ ضروري ترطيب البشره بشكل مكثف بعده.

9- غسول نيتروجينا هيدروبوست ووتر چل / Neutrogena® Hydro Boost Water Gel Cleanser

Neutrogena Cleanser
Neutrogena Cleanser

غسول نيتروجينا هيدروبوست بيوعد بترطيب البشره من الاعماق بالاضافه لازالة كل الشوائب من البشره و كمان بقايا المكياج و هو فعلًا بيقدر يرطب البشره بفضل وجود حمض الهيالورونيك في تركيبته و حمض الهيالورونيك معروف بقدرته علي حمل جزيئات المياه للبشره و ترطيبها من الداخل ، الغسول ده غير مناسب للبشرات الحساسه لانه بيحتوي علي نسبه من العطور و ان كانت نسبه قليله لكنها مش بتناسب كل الناس لكن ميزة الغسول ده انه سعره متوسط حوالي 170 جنيه مصري و منصحكيش باستخدامه لو بشرتك معرضه لظهور الحبوب.

8- غسول يورياچ هيسياك / Uriage Hyséac Cleansing Gel

Uriage Cleanser
Uriage Cleanser

غسول يورياج بالرغم من انه غسول في صورة Gel لكنه مش بيجفف البشره نهائي و ده برده رغم انه بيحتوي علي الـ Sulfate اللي بيجفف البشره علشان كده هو مناسب جدًا للبشره المختلطه ، كمان هو بيحتوي علي المياه الحراريه لـ يورياج و بيقلل من التهابات البشره و حجمه كبير تقدري تستخدميه فتره طويله باستمرار و كمان هو بيتميز بقدرته علي ازالة المكياج بكفاءه عاليه.

7-  غسول ناتري / Natry Foaming Cleanser

Natry Cleanser
Natry Cleanser

غسول ناتري من شركة ماكرو متوفر في السوق من سنين كتير جدًا و كان زمان بيسبب جفاف كبير جدًا للبشره لكن الشركه المنتجه قررت تطوّر في تركيبته و أضافت له بانثينول علشان يمنع الجفاف الناتج عن استخدامه او علي الاقل تقلله ، و بالفعل قدرت الشركه تحقق ده و دي خطوه ساعدت في انه يبقي غسول مناسب جدًا للبشره المختلطه ، كمان هو بيقلل الحبوب تحت الجلد بشكل كبير لانه بيحتوي علي خلاصة الزعتر و زيت شجرة الشاي اللي ليهم قدره عاليه علي التخلص من البكتيريا و تنقية مسام البشره.

6- بايوديرما سيبيم كلينسينج فومينج چل / Bioderma Sebium Cleansing Foaming Gel

Bioderma Cleanser
Bioderma Cleanser

بايوديرما من الماركات الفرنسيه الممتازه و الغسول ده منها المفروض انه للبشره الدهنيه و المختلطه لكنه ميناسبش الدهنيه و يفضل استخدامه للبشره المختلطه فقط و ده لانه مبيقدرش ينظم الافرارز الكبير للدهون بفاعليه كبيره و في نفس الوقت هو مش بيجفف البشره بشكل قوي رغم انه موجود ضمن مكوناته مواد بتسبب جفاف زي الـ Sulfate لكنه لحسن الحظ مش بيجفف ، كمان هو بيفرق بنسبه كويسه جدًا في محاربة الحبوب و البكتيريا ، سعره تقريبًا 220 جنيه و حجمه حوالي 200 مل و سهل تلاقيه في الصيدليات الكبيره.

5- اڤين كلينانس كلينسنج چل / Avène Cleanance Cleansing Gel

Avene Cleanser
Avene Cleanser

علي الرغم ان الغسول ده اعتبرناه أفضل غسول للبشره الدهنيه الا اننا مش هنقدر نعتبره الأفضل كمان للبشره المختلطه و ده لانه بيسبب جفاف كبير للبشره للاسف خلال تنظيمه للافرازات الدهنيه ، لكنه بيفضل اختيار جيد جدًا للبشره المختلطه لو هنراعي الترطيب الكافي بعد استعماله خاصًة في الاماكن الجافه من بشرتنا ، بيحتوي طبعًا علي المياه الحراريه لافين و كمان مناسب للبشره الحساسه و المتهيجه و بيتميز بانه خالي من الصابون.

4- فارماسيرز تي زون ديبلي كلينسينج فوم  / Pharmaceris T-Zone Deeply Cleansing Foam

Pharmaceris Cleanser
Pharmaceris Cleanser

زي ما اتكلمنا عن غسول فارماسيرز الجل في مقالة أفضل 10 غسولات للبشره الدهنيه لازم نتكلم عن الغسول الفوم في المقاله دي و ده لان الغسولات الفوم تعتبر الافضل للبشره المختلطه لانها مش بتجفف الجلد زي الغسولات اللي بتكون في صورة Gel ، الغسول ده بيحتوي علي الزنك اللي بيقلل من التهابات الجلد و كمان بيقلل الافرازات الدهنيه و كمان حمض الماندليك و ده نوع من احماض الفواكه المقشره للجلد و طبعًا حمض الساليسيليك اللي بيقضي علي البكتيريا ، و كمان داخل ضمن مكوناته الـ Mango Wax اللي بيرطب الجلد ، سعره متوسط 160 جنيه.

3- سيباميد كلير فيس كلينسينج فوم / Sebamed Clear Face Cleansing Foam

Sebamed Cleanser
Sebamed Cleanser

منتجات سيباميد كلها بتتميز بانها بتعادل حموضة البشره و ده عن طريق انها بتحتوي علي معدل حموضه 5.5 و ده مشابه جدًا لمعدل حموضة بشرتنا و ده معناه انه لا يمكن يسبب اي جفاف للبشره ، و كمان هو بيحتوي علي فيتامين B3 اللي بيقوي الحاجز المناعي للجلد و كمان بيعالج اي التهابات موجوده فيه و كمان بيحتوي علي مادة Montaline اللي بيتكافح البكتيريا المسببه لحب الشباب ، ممكن مش كل الناس تفضله لانه بيحتوي علي نسبه صغيره من العطور لكنها برده مش مؤذيه للبشره الحساسه ، سعره 240 جنيه مصري.

مقالات ذات صلة

2- لاروش بوزاي ايفاكلار چل / La Roche Posay Effaclar Gel

La Roche Posay Cleanser
La Roche Posay Cleanser

في مقال أفضل 10 غسولات للبشره الدهنيه اتكلمنا عن نفس الغسول ده من لاروش و اخد تقريبًا الترتيب السادس و كان السبب في كده انه مش بينظم الافرازات الدهنيه بشكل كبير و كمان كان ضمن مميزاته انه مش بيجفف البشره عشان كده هو مناسب جدًا للبشره المختلطه ، بيحتوي طبعًا علي نسبَه كبيره من المياه الحراريه اللي بتساهم بشكل كبير في تهدئة التهابات البشره و كمان بيحتوي علي حمض الساليسيليك اللي بيكافح الحبوب و بيقضي علي البكتيريا بدون ما يسبب جفاف زياده في البشره.

1- ايڤاثيرم ايڤابور بيوريفاينج كلينسينج جل / Ivatherm IVAPUR Purifying Cleansing Gel

Ivatherm Ivapur Cleanser
Ivatherm Ivapur Cleanser

البشره المختلطه بتحتاج غسول ينظم الافرازات الدهنيه في المناطق الدهنيه فيها و في نفس الوقت ميجففش المناطق الجافه علشان كده الغسول ده من ايڤاثيرم يعتبر افضل غسول متوفر في مصر للبشره المختلطه و ده بفضل احتوائه علي زيت العرعر اللي بيتميز بانه مضاد حيوي طبيعي و مضاد للالتهابات و كمان بيحتوي علي الـ Zinc PCA اللي بينظم الافرازات الدهنيه و كمان الجلسرين اللي بيساعد في ان الغسول ميجففش البشره ، متوفر منه حجمين 250 مل و 500 مل و سعر الحجم الصغير في حدود 250 جنيه مصري في الصيدليات الكبيره.

أفضل 10 غسولات للبشره الدهنيه

اترك تعليقاً

لن يتم نشر عنوان بريدك الإلكتروني.

مقالات ذات صلة

زر الذهاب إلى الأعلى
error: Content is protected !!