صحة وجمال

أفضل 10 كريمات أساس للبشره الجافه

أفضل 10 كريمات أساس للبشره الجافه
أفضل 10 كريمات أساس للبشره الجافه

أفضل 10 كريمات أساس للبشره الجافه . كتير من اصحاب البشره الجافه بيعانوا من استخدام اي كريم اساس علي بشرتهم خصوصًا في فصل الشتاء و كمان لو الفاونديشن تغطيته عاليه لانه بيكون شكله وحش علي البشره بس الحقيقه انهم لو بيراعوا حاجات مهمه قبل الميك اب او اثناء اختيار الميك اب مش هيتعرّضوا للمشاكل دي ، زي ان كتير من البنات اللي بشرتها جافه بتختار اي كريم اساس و مش بتهتم تعرف اذا كانت اصلًا هيناسبها او لا ده غير انهم مش بيرطّبوا بشرتهم قبل تطبيق المكياچ و ده غلط كبير ، اتكلمنا في موضوع فات عن مرطبات البشره الجافه تقدري تروحي تشوفيه عشان تعرفي تستخدمي ايه قبل الميك اب ، و الموضوع ده هنتكلم عن أفضل 10 كريمات أساس للبشره الجافه.

اختيار كريم أساس للبشره الجافه

عشان تختاري كريم الأساس المناسب ليكي كـ بشره جافه لازم تبعدي تمامًا عن اي كريم أساس Matte او Oil-Free لان شكلهم بيكون جاف تمامًا علي الجلد و هما مخصصين لأصحاب البشره الدهنيه فقط ، لكن لو انتي استخدمتيه و بشرتك جافه هيبان مخطط و شكله وحش جدًا ” ده طبعًا بغض النظر عن اني فعلًا في انواع من كريمات الأساس ممكن تناسب كل انواع البشره لانها لا Glowy اوي و لا Matte اوي ” ، المهم انك محتاجه كريم أساس فيه نسبة ترطيب او حتي زيوت علشان يندمج مع بشرتك بشكل حلو من غير مشاكل.

أرخص 10 كريمات أساس للبشره الجافه

من اهم الحاجات اللي بيحتاجها اصحاب البشره الجافه هي اللمعه الصحيه اللي للأسف مش بتكون موجوده في بشرتهم بطبيعتها نتيجة لـ قلة افراز الدهون فيها ، عشان كده في اختيار كريمات الاساس لازم نراعي اختيار كريم يضيف لمعه للوش و كمان نسبة ترطيب و ده هتلاقيه غالبًا في كريمات الاساس اللي قوامها Liquid ( سائل ) ، و علشان يبقي شكل الميك اب علي بشرتك ناعم و حلو هقولك كام نصيحه هيفرقوا معاكي جدًا ، و انتي كمان شاركينا بنصايحك في التعليقات.

نصائح لمكياج ناعم و صحي للبشره الجافه

  • الاهتمام بترطيب البشره قبل الميك اب خطوه لا غني عنها خصوصًا لأصحاب البشره الجافه ، و لازم طبعًا باستخدام مرطب قوي مناسب.
  • لازم تهتمي بترطيب اكتر مناطق في بشرتك بتتعرّض للجفاف زي حوالين الشفايف او حوالين الأنف و طبعًا متنسيش ترطيب محيط العين بكريم عين مناسب.
  • استخدام برايمر قبل كريم الأساس يكون مخصص للبشره الجافه و بيدّي لمعه للوش دي حاجه مهمه جدًا هتفرق معاكي بشكل كبير.
  • زي ما اتفقنا اختيار كريم أساس مرطب او كريم أساس الـ Finish بتاعه Satin او Dewy تعتبر اهم خطوه.
  • أكيد حتي لو بشرتك جافه هتحتاجي تثبتي الفاونديشن مكانه لفتره أطول و برده أنصحك باختيار باودر تثبيت مناسبه للبشره الجافه و ده هنتكلم عنه بعدين.
  • أفضل طريقه لدمج كريم الأساس لو بشرتك جافه هي استخدام بيوتي بلندر مبلوله و معصوره كويس جدًا علشان توصلي للوك ناعم و طبيعي.

أفضل 10 كريمات أساس للبشره الجافه

10- فاونديشن تو فيسد بورن ذيس واي / Too Faced Born This Way Foundation

فاونديشن توفيسد
فاونديشن توفيسد

فاونديشن هاي إند ممتاز لأصحاب البشره الجافه رغم ان مكتوب عليه Oil Free g لكنه علي البشره مش Matte بشكل كامل فـ هيناسب اصحاب البشره الجافه مع مراعاة الترطيب قبله و تغطيته عاليه ده غير ان درجاته كمان كتير و تقدري تختاري الدرجه المناسبه ليكي لكن مشكلته ان سعره عالي و مش مناسب لكل البنات و كمان هو استخدام مناسبات فقط لانه احساسه تقيل علي البشره نسبيًا ، و مشكلته الكبيره في مصر انه موجود اونلاين فقط و هي دي الاسباب اللي خلتني اعتبره في المركز العاشر رغم جودته.

9- فاونديشن ايسنس فريش اند فت / Essence Fresh And Fit Foundation

فاونديشن ايسنس
فاونديشن ايسنس

كريمات اساس ايسنس بتجمعها ميزه و عيب ، الميزه هي ان اسعارها رخيصه جدًا و تناسب كل البنات خاصًة بنات الجامعه و العيب هو ان درجاتهم للأسف مش متنوعه و لا متاحه بشكل كبير ده غير ان الدرجه بتتأكد ” لونها بيغمق ” بعد شويه ، لكن هو تغطيته من خفيفه لـ تحت المتوسطه و مناسب للاستخدام اليومي و شكله علي البشره Dewy يعني فيه لمعه فـ انصحك بيه لو ميزانيتك محدوده و لو لقيتي درجتك المناسبه فيه.

8- فاونديشن ريميل ماتش بيرفيكشن / Rimmel Match Perfection Foundation

فاونديشن ريميل
فاونديشن ريميل

الفاونديشن ده متوفر منه علي مستوي العالم درجات كتير لكن في مصر متوفر درجات محدوده مش بتناسب كل درجات البشره ، سعره متوسط يميل للعالي شويه و حجمه مناسب بس للاسف احساسه علي البشره تقيل نسبيًا و ده هيضايق بعض الناس لكن مش بيبين اي جفاف في البشره خالص و شكله طبيعي كمان.

7- فاونديشن لاجيرل برو كڤردج / L.A Girl Pro Coverage Foundation

فاونديشن لاجيرل برو كفرج
فاونديشن لاجيرل برو كفرج

فاونديشن لاجيرل تغطيته عاليه و بيحتوي علي نسبة ترطيب عاليه علشان يناسب البشرات شديدة الجفاف من غير ما يبيّن اي قشور فيها او جفاف زياده ، و لأن تغطيته عاليه انصحك باستخدامه في المناسبات فقط علشان متعرّضيش بشرتك لأي اضرار ، سعره متوسط و درجاته بتغمق لما بتندمج مع البشره لكن درجاته متاحه بشكل كبير.

6- فاونديشن ميبلين فت مي ديوي + سموز / Maybelline Fit Me Dewy + Smooth Foundation

فاونديشن ميبلين ديوي + سموز
فاونديشن ميبلين ديوي + سموز

فاونديشن ميبلين ده من اسمه هو مناسب جدًا جدًا لأصحاب البشره الجافه و ده لانه اللوك النهائي له لامع و صحي و زي ما قولنا دي حاجه اصحاب البشره الجافه دايمًا محتاجينها ، تغطيته متوسطه و ميزته انه خفيف علي البشره تقدري تستخدميه بشكل يومي او خلال النهار و كمان سعره مناسب مش غالي خالص و درجاته متنوعه و مناسبه لدرجاتنا كـ عرب.

5- فاونديشن ويت ان وايلد فوتو فوكس / Wet N Wild Photo Focus Foundation

فاونديشن ويت ان وايلد
فاونديشن ويت ان وايلد

نفس الفاونديشن كنت اتكلمت عنه في موضوع أفضل 10 كريمات أساس للبشره الدهنيه و هو بالفعل مناسب للبشره الدهنيه و كمان الجافه لانه في النهايه علي البشره بيكون شكله Satin يعني مش مطفي بحيث يقل لمعة البشره الدهنيه و كمان مش لامع ، تغطيته متوسطه و بقي متوفر في مصر بشكل كبير و سعره حوالي 200 جنيه ، له ريحه غير مستحبه لكن بتروح بالدمج.

4- فاونديشن لوريال انفالبل برو جلو / l’oreal Infallible Pro-Glow Foundation

فاونديشن لوريال برو جلو
فاونديشن لوريال برو جلو

فاونديشن خفيف جدًا ليه معامل حمايه من الشمس 18 لكن طبعًا مش كافيه لحمايتك من الشمس و لا هي نسبه تقدر تعمل فلاش باك لو هتتصوري ، و الاهم انك مش بتحسي ان في طبقه علي البشره و كمان بيندمج تمامًا معاها فـ بيظهر شكله طبيعي جدًا من غير اي تكتلات ، تقدري تستخدميه الصبح لكن منصحش بيه استخدام يومي و الافضل تستخدميه في المناسبات ، سعره حوالي 320 جنيه مصري و درجاته كتير فـ اكيد هتلاقي اللي يناسبك منهم.

3- فاونديشن لوريال ترو ماتش / L’oreal True Match Foundation

فاونديشن لوريال ترو ماتش
فاونديشن لوريال ترو ماتش

اتكلمت عن الفاونديشن ده في موضوع أفضل 10 كريمات أساس للبشره الدهنيه و قولت انه شكله النهائي علي البشره مش مطفي تمامًا و في نفس الوقت مش لامع و النقطه دي تخليني اقولكم انه مناسب لكل انواع البشره و هو واحد من كريمات الأساس المفضله ليا شخصيًا ، تغطيته متوسطه تقدري توصليها لـ عاليه بزيادة طبقه علي البشره ، درجاته حلوه جدًا و بتجمع بين الأندرتون الأصفر و المحايد و البينك و سعره كمان لطيف و متاح في اي استور ميك اب اوريچينال.

2- فاونديشن لوريال انفالبل 24 ساعه فريش وير / L’oreal Infallible 24hr Fresh Wear

فاونديشن لوريال فريش وير
فاونديشن لوريال فريش وير

من كريمات الأساس اللي نزلت مصر مؤخرًا و حصل عليه ضجه كبيره و هو فعلًا يستحقها لان تغطيته عاليه و درجاته متوفره بشكل كبير ، يمكن مشكلته ان الدرجه بس بتغمق بعد شويه لكن ممكن تختاري درجه افتح منك بحيث لما تغمق تبقي نفس درجتك ، سعره متوسط و يناسب فئه كبيره من البنات و ثباته كويس جدًا.

1- فاونديشن بورچوا هيلثي ميكس / Bourjois Healthy Mix Foundation

فاونديشن بورجوا هيلثي ميكس
فاونديشن بورجوا هيلثي ميكس

من الفاونديشنز المعروفه جدًا للبشره الجافه و بيتميز بتغطيته و احساسه الخفيف علي البشره في نفس الوقت ، بيضيف للبشره الجافه لمعه صحيه جميله جدًا و بيرطبها و تقدري تستخدميه في المناسبات و كمان الصبح لانه مش تقيل ابدًا و لو بشرتك فيها عيوب كتير هيقدر يغطّيها بشكل جميل من غير ما يظهر مكتّل او Cakey.

اترك تعليقاً

لن يتم نشر عنوان بريدك الإلكتروني.

مقالات ذات صلة

زر الذهاب إلى الأعلى
error: Content is protected !!