أفضل 10 ماسكات لعلاج حب الشباب

أفضل 10 ماسكات لعلاج حب الشباب
شارك هذه المقالة مع أصدقائك!

أفضل 10 ماسكات لعلاج حب الشباب . علي مر العصور و الازمنه الناس بتستخدم الماسكات لحل مشاكل كتير في بشرتها و حتي امهاتنا و جداتنا كانوا مهتمين جدًا باستخدام الماسكات خاصًة الطبيعيه منها ، لكن الحقيقه اللي منقدرش ننكرها ان مش كل اللي كانوا بيعملوه زمان كان صح و لا كل اللي كانوا بيعملوه زمان ينفع احنا نعمله دلوقتي لان كل حاجه مختلفه سواء الظروف البيئة او عوامل الجو اللي بتأثر علي بشرتنا او حتي وعينا احنا كـ بنات حتي و قبل ما نوضّح ايه هما أفضل 10 ماسكات لعلاج حب الشباب محتاجين نوضّح كام نقطه مهمه مش كتير هيقولك عليها.

أفضل 10 ماسكات لعلاج حب الشباب
أفضل 10 ماسكات لعلاج حب الشباب

ماسكات طبيعيه و فعاله لحب الشباب

الماسكات سواء طبيعيه او جاهزه فـ هي عمرها ابدًا ما كانت علاج لـ مشكله واضحه في البشره هي نقدر نسمّيها منقذ مؤقت او مساعد اضافي في حل المشكله لكن لو قولتلك انها تقدر تكون حل جذري لمشكلة معينه انتي بتعاني منها اتأكدي اني بضحك عليكي ، يعني مثلاً الماسكات اللي هنتكلم عنها النهارده هتساعدك في تقليل افراز الدهون في بشرتك و بالتالي تقليل فرصة ظهور الحبوب او تسحب دهون البشره الزياده فـ تجفف الحبوب لكن ده لو الحبوب في بشرتك مش حاله مرضيه ، و برده كتير مش هيبقي عارف يعني ايه حاله مرضيه.

الحبوب لما تنتشر في البشره بشكل كبير و بأعداد كبيره و متبقيش قادره تسيطري علي المشكله مهما استخدمتي فـ هي كده حبوب مرضيه محتاجه تراجعي فيها طبيب مختص و متسمعيش اي نصايح من شخص تاني ، لكن لو الحبوب في بشرتك بتظهر في اوقات الدوره الشهريه او بتظهر لو اكلتي اكل معين بيتسبب اصلًا في ظهور الحبوب زي المقليات و المكسرات و منتجات الالبان و غيرهم كتييير تبقي الحبوب عندك موجوده بشكل طبيعي و منطقي جدًا و تقدري تستعيني بالماسكات في علاجها مع مراعاة انك تبعدي عن المأكولات اللي اتسببت في المشكله دي.

أفضل 10 ماسكات لعلاج حب الشباب

هنتكلم في المقاله دي عن أفضل 10 ماسكات لعلاج حب الشباب و هنجمع بين الماسكات الجاهزه اللي تقدري تشتريها سواء اونلاين او من الصيدليه و الماسكات الطبيعيه اللي تقدري تعمليها بنفسك في البيت و تستخدميها بأمان تام من غير ما تأثر علي بشرتك بالسلب.

10- ماسك القهوه + زيت شجرة الشاي / Coffee + Tea Tree Oil Mask

Coffee Mask
Coffee Mask

كتير اوي من البنات مبيقدروش يشتروا ماسكات جاهزه علشان كده حبينا نكلمكم عن ماسك طبيعي فعّال و في نفس الوقت نقولكم ان مش معني ان مكونات الماسك طبيعيه تبقي مش هتضر بشرتك المعلومه دي غلط لان في مكونات طبيعيه قاسيه جدًا علي الجلد زي الليمون و القرفه و غيرهم كتير، و علشان منطوّلش عليكم الماسك بتاعنا ده عباره عن معلقتين بن + معلقتين جل صبار خام + نقطتين من زيت شجرة الشاي الطبيعي، تقلبيهم كويس لحد ما القوام يتجانس و توزعيه علي بشرتك لحد ما ينشف، القهوه معروفه انها مضاد اكسده قوي و جل الصبار هيساعدك في التخلص من الدهون الزياده و طبعًا زيت شجرة الشاي بيقضي علي البكتيريا المسببة لحب الشباب.

9- ماسك اوريچينز بالفحم النشط / Origins Active Charcol Mask

Origins Mask
Origins Mask

ماسك اوريچينز بالفحم النشط و كمان الطمي الابيض رائع جدًا لاصحاب البشره الدهنيه لانه بيشتغل زي المغناطيس بيسحب كل الاوساخ و الاتربه و الدهون من الجلد و لو عندك اي رؤوس سوده هيخلصك منها بالاضافه لانه بينعّم البشره جدًا و بيجفف الحبوب، خالي من اي مواد ضاره بالجلد زي البارابين و الزيوت المعنديه و السلفات و غيرهم كتير من المواد اللي بتأذي البشره جدًا ، مشكلته للأسف ان سعره عالي جدًا و مش متوفر غير اونلاين و حتي مش سهل تلاقيه فـ بنصحك تختاري ماسك تاني من اللي هنتكلم عنهم.

8- ماسك طمي لايكو بالماتشا / Laikou Matcha Mud Mask

Matcha Mud Mask
Matcha Mud Mask

صعب جدًا نلاقي ماسك طمي مبينشفش البشره لان اساس الطمي هو انه يسحب دهون الجلد فـ لما نلاقي ماسك طمي بيخلي البشره رطبه اكتر ده بيكون شئ مذهل! الماسك ده كوري و بالاضافه لانه ماسك طمي هو كمان معاه شاي الماتشا اللي بينقي البشره و يخلصها من السموم و الاوساخ و الاتربه اللي تراكمها بيساعد في ظهور الحبوب، لكن الماسك ده مش بينضف بشكل عميق اوي و ده ممكن ميفضلوش اصحاب البشره الدهنيه جدًا، هو سعره تقريباً 220 جنيه مصري و حجمه مناسب لكنه مش متوفر الا اونلاين.

7- ماسك ذا بادي شوب بزيت شجرة الشاي / The Body Shop Tea Tree Mask

The Body Shop Mask
The Body Shop Mask

زيت شجرة الشاي من اقوي المواد الطبيعيه في محاربة البكتيريا و التخلص من السموم و الدهون المتراكمه في الوجه و وجوده في اي منتج بيبهر الناس دايمًا و يضاعف عندهم الحماس ناحية المنتج ده خاصًة لو بشرتهم دهنيه او بيعانوا من الحبوب، و بالفعل الماسك ده ممتاز لاصحاب البشره الدهنيه و بيقدر يسيطر علي ظهور الحبوب بفضل وجود زيت شجرة الشاي في تركيبته و كمان بينعّم البشره و بيديها حيويه و نضاره، لكن للأسف سعره حوالي 450 جنيه مصري و حجمه مش كبير اوي، تقدري تشتريه من فروعهم في مول مصر او مول العرب و غيرهم.

6- ماسك هيمالايا للتنقيه بعشبة النيم / Himalaya Purifying Neem Mask

Himalaya Mask
Himalaya Mask

من الماسكات الطينيه الرخيصه و المتوفره في مصر بسهوله جدًا يعني تقدري تشتريه من اي صيدليه او هايبر ماركت و سعره حوالي 70 جنيه مصري بس، هو ماسك طيني داخل ضمن مكوناته الطمي و عشبة النيم اللي بيساعدوا علي تقليل الافرازات الدهنيه في البشره و كمان لو بشرتك فيها حبوب هيساعدك في انها تنشف أسرع و تتخلصي منها، طريقة استخدامه الصح هي انك تفرديه علي بشرتك ما عدا منطقة العين و تستني حوالي 20 دقيقه و تغسليه بمياه فاتره و ضروري طبعًا خطوة الترطيب بعده، للاسف مش مناسب لو البشره حساسه.

5- ماسك لاروش بوزاي ايفاكلار انتي شاين / La Roche Posay Effaclar Anti-Shine Creamy Mask

La Roche Posay Mask
La Roche Posay Mask

لما نستخدم منتج علي بشرتنا يكون طبّي خالي من العطور و الكحول و البارابين و كل ما هو مضر بالبشره بنبقي مطمنين جدًا و ده السبب ورا شهرة الماسك ده من لاروش بوزاي، طبعًا ده بالاضافه لانه فعلًا ماسك فعّال في شد البشره و ازالة الدهون المتراكمه و بالتالي شكل اصغر للمسام بسبب انه بيحتوي علي الطمي الأبيض في تركيبته و كمان بيحتوي علي حمض الهيالورونيك و ده اللي بيخليه ميسببش اي جفاف للبشره نهائي، للأسف رغم جودته هو مش هيبقي افضل اختيار بسبب سعره العالي علي حجمه، سعره 340 جنيه مصري و حجمه 100 مل.

4- ماسك لوريال باريس بالطين النقي و الفحم / L’Oréal Paris Pure Clay With Charcoal

L'Oreal Mask
L’Oreal Mask

من فتره بسيطه نزلت لوريال ماسكاتها في مصر و انتشرت بشكل كبير جدًا و هما عباره عن 3 ماسكات المكوّن الاساسي فيهم هو الطمي النقي و يعتبر النوع ده هو أفضلهم خاصًة للبشره الدهنيه لانه فيه فحم كمان بالاضافه للطمي و ده يعني تنضيف عميق جدًا لمسام البشره و بالفعل هو منظف قوي جدًا للمسام و بيرجّع للبشره نضارتها و لمعانها بشكل فوري و ده بيخليه مناسب جدًا لو عندك مناسبه، سعره حوالي 220 جنيه و متوفر في الصيدليات الكبيره في مصر لكن حجمه مش كبير و ده بيتعارض مع سعره العالي بصراحه.

3- ماسك كوين هيلين بالنعناع / Queen Helene Mint Julep Mask

Queen Helene Mask
Queen Helene Mask

الماسك ده فيه نوعين من الطمي و هما البينتونيت و الكاولين و كمان من مكوناته الاساسيه النعناع و التركيبه دي ساعدته في انه يبقي واحد من أفضل الماسكات للبشره الدهنيه، هو ماسك جاهز ريحته منعشه جدًا لانها ريحة نعناع ده غير ان احساسه علي البشره كمان منعش و بيساعد جدًا في تهدئة البشره و التخلص من الحبوب البسيطه و بشكل فوري بتلاقي بشرتك منوّره و شكلها أفتح، مناسب جدًا لو بشرتك حساسه و الحلو فيه انه مش بيجفف البشره بشكل مبالغ فيه، سعره 200 جنيه و حجمه 200 مل و ده حجم كبير، متوفر اونلاين فقط.

2-  ماسك الطمي المغربي من نفرتاري / Nefertari Moroccan Clay Mask

Nefertari Moroccan Mud
Nefertari Moroccan Mud

نفرتاري ماركه مصريه مشهوره جدًا بجودة منتجاتها اللي بتتميز بانها طبيعيه 100% و الماسك ده طبيعي فعلًا و بيكون عباره عن قطع بتدوبي جزء منها حسب احتياجك في كميه بسيطه من المياه او مياه الورد حسب رغبتك و توزعيه علي بشرتك و تستني لحد ما ينشف و تغسليه ، يعتبر من افضل الماسكات لانه بيسحب كل الدهون من الجلد و يسيبه شكله صحي اكتر و نضيف، يفضّل تستخدميه بعد حمام بخار لنتيجه أفضل، سعره حوالي 120 جنيه و حجمه مناسب هيكفّي معاكي فتره كبيره، الافضل تعمليه في طبق بلاستيك و تقلبيه كمان بـ معلقه بلاستيك مش معدن.

1- ماسك الطمي الهندي ازاتك سيكريت / Aztec Secret Indian Clay Mask

Indian Clay Mask
Indian Clay Mask

ماسك الطين الهندي مشهور عالميًا و تقييمه في كل المواقع عالي و هو فعلًا يستاهل التقييم ده، مبدئيًا هو ماسك علي هيئة بودره و انتي اللي بتعمليه بنفسك عن طريق انك تاخدي كميه مناسبه منه و تضيفي عليها خل التفاح و تبدئي توزعيه علي بشرتك و تغسليه بالمياه اول ما ينشف ، بينضف المسام بعمق جدًا و بيساعدك تتخلصي من اي رؤوس سوده او حبوب او دهون متراكمه في بشرتك، بعد ما تغسليه هتلاقي بشرتك لونها أحمر لكن متقلقيش ده طبيعي، غير مناسب للبشره الحساسه و مش متوفر في مصر غير اونلاين و سعره عالي شويه حوالي 300 جنيه لكن يشفعله انه حجمه كبير جدًا حوالي نص كيلو.

تعليقان

تعليقان

أضف تعليقا

  1. التنبيهات : أفضل 10 أنواع مرطب - أفضل 10

  2. التنبيهات : الحرة نيوز – أفضل 10 أنواع مرطب - أفضل 10 - أخبار الحرة - آخر الأخبار وأحدث المستجدات لحظة بلحظة

اترك تعليقاً