محتوي المقالة
- 1 اسعار مرطبات البشره الجافه
- 1.1 10- نوكس ريڤ دو ميّ الترا كمفورتبل نايت / Nuxe Rêve du meil ultra comfortable Night
- 1.2 9- سيباميد انتي دراي كريم / Sebamed Anti-Dry Cream
- 1.3 8- كليو الترا مويستشر كريم / Cleo Ultra Moisture Cream
- 1.4 7- بي اند بي ايمولينت / B&B Emollient
- 1.5 6 – ڤيشي اكواليا ثيرمال لايت كريم / Vichy Aqualia Thermal Light Cream
- 1.6 5- ماكرو بانثينول كريم / Macro Panthenol Cream
- 1.7 4- يورياچ زيموس كريم / Uriage Xémose Face Cream
- 1.8 3- اڤين تريكسيرا نيوتريشن / Avène Trixera Nutrition
- 1.9 2- لاروش بوزاي ليپيكار بووم / La Roche Posay Lipikar Baume
- 1.10 1- بايوديرما أتوديرم انتينسيڤ بووم / Bioderma Atoderm Intensive Baume
أفضل 10 مرطبات للبشره الجافه . اتكلمنا في موضوع قبل كده عن مرطبات البشره الدهنيه و اهمية الترطيب ليها و المره دي هنتكلم عن مرطبات البشره الجافه و تقريبًا مفيش حاجه مهمه للبشره الجافه تحديدًا زي الترطيب و ده لانه بيحميها من التشققات و بيعتبر عازل بين الملوثات الجويه و الجلد و كمان الترطيب بيأخر التجاعيد و ظهور علامات التقدم في السن ، و تعتبر البشره الجافه في اغلب الاوقات قابله لانها تكون حساسه و علشان كده هنتكلم عن مرطبات تقدري تستخدميها حتي لو كانت بشرتك حساسه بدون اي خوف ، و كمان هنراعي الميزانيه المختلفه بينا كلنا.
اسعار مرطبات البشره الجافه
كتير من اصحاب البشره الدهنيه بيحلموا بشرتهم تكون جافه و ده راجع لقلة المشاكل اللي بتتعرضلها البشره الجافه و بالفعل البشره الجافه مش من الطبيعي تتعرض لظهور الحبوب و لا بيعاني اصحابها من المظهر اللامع اللي بيعاني منه اصحاب البشره الدهنيه لكن للأسف هي من البشرات اللي بيظهر عليها التقدم في السن بسرعه في حالة عدم الاهتمام بيها بالشكل المطلوب ، و زي ما اتفقنا عمر الاهتمام بالبشره و الشعره ما كان خارجي بس و لازم يكون داخلي عن طريق التغذيه السليمه و شرب قدر كافي من الماء خلال اليوم و حماية البشره من اشعة الشمس الضاره.
في اللي جاي هشارك معاكم بعض من مرطبات البشره الجافه و تقدري تختاري اللي يناسب ميزانيتك و كمان اللي يناسب طبيعة بشرتك اذا كانت حساسه او لأ ، و متنسيش ان تجاربنا مش لازم هتتفق و ان اللي قال لولا اختلاف الاذواق لـ بارت السلع كان صح و لو ليكي تجربه ناجحه مع اي منتج سواء تم ذكره خلال المقاله او لأ نحب تشاركينا التجربه في التعليقات.
10- نوكس ريڤ دو ميّ الترا كمفورتبل نايت / Nuxe Rêve du meil ultra comfortable Night
مرطب نوكس للبشره الجافه من المرطبات اللطيفه جدًا و قوامه تقيل علي الرغم من احساسه الخفيف علي البشره و اللي في نفس الوقت بيرطب ترطيب عميق و كمان بيتميز باللمعه اللي بيضيفها للبشره الجافه و اللي بتكون محتاجه لـ ده جدًا ، لكن للأسف في عوامل كتير تخلينا نعتبره اختيار اخير و هو سعره العالي و كمان هتضطري يكون عندك منه النهاري و الليلي لانه مفيش منهم كريم واحد تقدري تستخدميه صبح و ليل و دي تكلفه عاليه.
السعر / 550 جنيه مصري ، السعه / 50 مل.
9- سيباميد انتي دراي كريم / Sebamed Anti-Dry Cream
بتتميز ماركة سيباميد بمعدل الحموضه الملائم لدرجة حموضة البشره و هو 5.5 و ده بيخلي منتجاتها امان للبشره الحساسه و المتضرره كمان ، و المرطب ده واحد من المرطبات القويه لانه قوامه تقيل علي البشره و بيرجعلها المرونه و يقوي الحاجز الواقي كمان و مناسب للاستخدام تحت المكياج ، مشكلته انه غير متوفر بسهوله و موجود منه كريم نهاري و كريم ليلي.
السعر / 340 جنيه ، السعه / 50 مل.
8- كليو الترا مويستشر كريم / Cleo Ultra Moisture Cream
مرطب كليو للبشره الجافه مش بس بيتميز بترطيبه العالي للبشره بفضل وجود زبدة الشيا و البانثينول في تركيبته ، لكن بيميزه انه بيحمي البشره من العوامل الجويه المضره و الملوثات زي الادخنه و الاتربه عن طريق تقنية الـ Pollushield و كمان بيهديها بعد التعرض لأشعة الشمس ، و سعره متوسط بالاضافه لإن حجمه مناسب جدًا للاستخدام فتره طويله ، و للاسف غير مناسب للاطفال او للبشره الحساسه.
السعر / 180 جنيه مصري ، السعه / 200 مل.
7- بي اند بي ايمولينت / B&B Emollient
من افضل كريمات الترطيب المحليه و اللي سعرها في متناول الايد كمان ، قوامه تقيل الي حد ما و لكن مش بيسد مسام البشره نهائي + ان بشرتك هتمتصه بسرعه و بشكل كامل بدون ما تحسي بـ طبقه سميكه علي بشرتك ، متوفر منه حجمين و الاتنين سعرهم رخيص تقدري تختاري الأنسب ليكي.
السعر / 30 -50 جنيه مصري جنيه مصري ، السعه / 50 – 120 جرام.
6 – ڤيشي اكواليا ثيرمال لايت كريم / Vichy Aqualia Thermal Light Cream
منتجات ڤيشي زي اغلب المنتجات الطبيه الفرنسيه بتحتوي علي نسبه عاليه من المياه الحراريه و المرطب ده واحد من المنتجات الرائعه في ڤيشي لانه خالي من البارابين و بيضمن للبشره ترطيب ممتاز ، هو مناسب فقط للبنات من سن 20 فيما فوق و للاسف غير مناسب للبشره الحساسه و اللي بيوعد بيه المرطب ده هو توفير ترطيب عالي للبشره لمدة 48 ساعه بالاضافه لتنعيم ملمس الجلد و تلطيفه بدون ترك اي ملمس دهني عليه.
السعر / 369 جنيه مصري ، السعه / 50 مل.
5- ماكرو بانثينول كريم / Macro Panthenol Cream
البانثينول في حد ذاته ماده فعاله موجوده في اي منتج بيهتم بالمحافظه علي معدل ترطيب البشره بكل انواعها و مش بس في الكريمات و لكن موجود في سيرمات و غسولات للبشره كتير ، فـ ما بالك لما يكون مرطب عباره عن الماده الفعاله دي نفسها ؟ تفتكري هيرطّب ازاي ؟ اكيد هيكون الترطيب عالي من غير شك ، و المتوقع انه يكون سعره عالي طبعًا لكن المرطب ده محلي و سعره رخيص جدًا و مناسب للاستخدام علي كل الجسم و لكن غير مناسب للاطفال.
السعر / 20 جنيه مصري ، السعه / 50 جرام.
4- يورياچ زيموس كريم / Uriage Xémose Face Cream
مرطب يورياچ زيموس هو واحد من افضل المرطبات للبشره الجافه لانه مش بس بيرطب سطحها الخارجي لكن كمان بيرطب طبقات الجلد العميقه ، و بيحتوي علي نسبة عاليه من الاحماض الدهنيه اللي بسهوله بتفقدها البشره الجافه خاصةً في فصل الشتا ، قوامه مناسب للبشره الجافه و شديدة الجفاف و خالي من الكحول و العطور لكن للاسف غير مناسب للاطفال او الحوامل.
السعر / 225 جنيه مصري ، السعه / 40 مل.
3- اڤين تريكسيرا نيوتريشن / Avène Trixera Nutrition
اڤين واحده من اقوي الماركات المهتمه بالبشره في العالم و اللي بينصح بمنتجاتها دكاترة الجلديه دايمًا و المرطب ده قوامه فلويد و ده قوام خفيف مستحيل يزعج البشره و في نفس الوقت هيرطبها ترطيب فائق ، و بيتميز عن مرطبات تانيه كتير بوجود المياه الحراريه فيه بنسبه عاليه و ده اللي بيساعده في تهدئة الجلد و ترطيبه بلطف و استعادة الاحماض الدهنيه اللي الجلد محتاجها ، تقدري تستخدميه للجسم بالكامل و لأطفالك من اول سن 3 سنوات للحفاظ علي ترطيب جلدهم و منعه من الالتهابات المزعجه ليكي و ليهم كمان.
السعر / 349 جنيه مصري ، السعه / 400 مل.
2- لاروش بوزاي ليپيكار بووم / La Roche Posay Lipikar Baume
الحقيقه اني من اشد المعجبين بمنتجات لاروش بوزاي و المرطب ده تحديدًا رائع و وجوده في المرتبه التانيه ميقللش من كفاءته اطلاقًا بالعكس هو ميختلفش كتير عن مرطب بايوديرما ، مناسب لجميع افراد الاسره حتي الاطفال من عمر يوم تقدري و بكل سهوله تستخدميه لبشرتهم خاصًة لو اتعرضت لاكزيما او جفاف شديد مصاحب بالتهاب ، كمان مناسب جدًا للاستخدام علي جميع مناطق الجسم للترطيب الفائق و تقوية الحاجز الواقي للبشره و بالتأكيد مناسب للبشره الحساسه.
السعر / 310 جنيه مصري ، السعه / 200 مل.
1- بايوديرما أتوديرم انتينسيڤ بووم / Bioderma Atoderm Intensive Baume
من وجهة نظري و تجربتي الشخصيه بايوديرما ابدعت في المرطب ده و ممكن نقتصر وجود الشركه بالكامل عليه لانه حقيقي عظيم ، هتحتاجي ايه من مرطب اكتر من انه يرطب بشرتك الجافه بعمق بدون ما يسيب اي ملمس مزعج علي بشرتك و في نفس الوقت خالي من اي عطور ؟ اكيد مش هتحتاجي اكتر من كده ، مرطب بايوديرما هيحققلك ده كله ببساطه و مناسب كمان للاطفال و الرضع و حتي الحوامل ، و طبعًا مناسب جدًا لو بشرتك حساسه او ملتهبه بالفعل.
السعر / 339 جنيه مصري ، السعه / 200 مل.
