صحة وجمال

أفضل 10 مرطبات للبشره الدهنيه

أفضل 10 مرطبات للبشره الدهنيه
أفضل 10 مرطبات للبشره الدهنيه

أفضل 10 مرطبات للبشره الدهنيه . كتير مننا ميعرفش ان البشره الدهنيه بتحتاج ترطيب زيها زي اي نوع بشره تاني و بنات كتير فاكره ان طول ما بشرتنا بتفرز دهون يبقي لو رطبناها هنكون بنضرها لكن بالعكس !

ترطيب البشره الدهنيه يعتبر خدعه ليها بـ معني انك لما ترطّبي بشرتك هي هتحس انها مش محتاجه تفرز دهون

و هتكتفي بس بـ الترطيب الخارجي ده و ده معناه ان بشرتك هتلمع بشكل اقل

و كمان هتقللي فرصة تكوّن الحبوب و الرؤوس السوده و غيرهم من المشاكل اللي بتواجهنا كلنا

ده غير ان ترطيب البشره خطوه لا غني عنها قبل تطبيق المكياج علي بشرتك مهما كان نوعها.

ترطيب البشره الدهنيه

مش هي دي بس فوايد ترطيب البشره الدهنيه لكن كمان الترطيب بشكل عام بيساعد جدًا في تأخر ظهور التجاعيد و الحفاظ علي نضارة البشره و الاطلاله الصحيه ليها دايمًا و تقوية الحاجز الواقي ليها

و علشان نحقق المعادله الصحيحه لازم كمان نحافظ علي ترطيب البشره داخليًا عن طريق شرب كميه كافيه من المياه و السوائل و اتباع نظام غذائي صحي غني بالفواكه و الخضروات

و لكن هل اي مرطب ممكن استخدمه علي بشرتي ؟ بالتأكيد لأ ، احنا حقيقي محتاجين نرطب البشره لكن باستخدام المرطب المناسب ليها و لـ طبيعتها مع 10 مرطبات للبشره الدهنيه .

لأن البشره الدهنيه محتاجه ترطيب و لكن بصوره خفيفه تطفي اللمعه الغير مرغوب فيها و كمان متسدّش مسام بشرتنا نهائيًا

و الافضل في ترطيب البشره الدهنيه هي المرطبات اللي قوامها في صورة Gel و بناءًا علي كل ده انصحك دايمًا باختيار مرطب مكتوب عليه :

  • خالي من الزيوت / Oil Free.
  • يقلل لمعان البشره / Mattifying.
  • لا يسد مسام البشره / Non-comedogenic – Won’t clog pores.
  • ذو قاعده مائيه / Water based.

و دلوقتي هرشحلك أفضل 10 مرطبات للبشره الدهنيه و اللي كلهم متوفرين في مصر و الوطن العربي بسهوله مع مراعاة تفاوت الاسعار و الاحجام علشان نقدر نفيد جميع المستويات قدر الامكان

و الترتيب هيكون من الاقل جوده للاعلي جوده و لازم ناخد في اعتبارنا ان التجارب بتختلف و لو بتفضّلي منتج من دول عن التاني اكيد كملي في استخدامه.

10- نيتروجينا هيدرو بوست ووتر جل / Neutrogena Hydro Boost Water Gel

نيتروجينا هيدرو بوست ووتر جل / Neutrogena Hydro Boost Water Gel
نيتروجينا هيدرو بوست ووتر جل / Neutrogena Hydro Boost Water Gel

اولا من الاسم واضح انه جل مش كريم يعني نقدر نعتبره اخف منتج للترطيب من بين كل المنتجات دي لكن من وجهة نظري هو في المرتبه الاخيره لانه مش هيناسب البشره الحساسه نهائيًا

كمان زي ما كتير مننا عارف نيتروجينا ماركه تجاريه غير طبيه و منتجاتها فيها نسبه كبيره من العطور

لكنه خالي من الزيوت و بيحتوي علي حمض الهيالورونيك المعروف بترطيبه الفائق و تعويضه الجلد بالرطوبه

و منقدرش ننكر انه فعلاً كويس لو البشره غير حساسه و كمان سعره متوسط.

السعر : 155 جنيه مصري / الحجم : 48 جرام.

9- فيشي نورمادرم فايتوسوليوشن دبل كوريكشن / Vichy Normaderm Phytosolution double Correcting

فيشي نورمادرم فايتوسوليوشن دبل كوريكشن / Vichy Normaderm Phytosolution double Correcting
فيشي نورمادرم فايتوسوليوشن دبل كوريكشن / Vichy Normaderm Phytosolution double Correcting

مثلا كريم فيشي مش بس مرطب مناسب جدًا للبشره الدهنيه لكنه كمان بيصحح عيوب البشره من تصبغات و احمرار

و حتي الحبوب و ده لانه بيحتوي علي حمض الساليسيليك بتركيز 1.5% و يعتبر حمض الساليسيليك افضل صديق للبشره الدهنيه

غير كده كمان فـ الكريم ده بيوعد بترطيب فائق لمدة 24 ساعه لكنه للاسف غير مناسب للبشره الحساسه بسبب احتوائه علي نسبه من العطور.

السعر : 359 جنيه مصري / السعه : 50 مل.

8- فارماسيرز سيبو مويستاتيك / Pharmaceris Sebo-Moistatic

فارماسيرز سيبو مويستاتيك / Pharmaceris Sebo-Moistatic
فارماسيرز سيبو مويستاتيك / Pharmaceris Sebo-Moistatic

كذلك فارماسيرز تعتبر من الماركات اللي اسعارها في متناول الجميع

و بجوده مناسبه كمان و بالأخص الكريم ده منها مناسب لترطيب البشره الدهنيه

بدون ما يزود دهون البشره او لمعانها لكنه مش اخف قوام علي البشره الدهنيه

و من أفضل مميزاته انه بيحتوي علي معدل حمايه من الشمس بمعامل 30.

السعر179 جنيه مصري / السعه : 50 مل.

7- لوشن سيتافيل / Cetaphil Lotion

لوشن سيتافيل / Cetaphil Lotion
لوشن سيتافيل / Cetaphil Lotion

لوشن سيتافيل مش بس للوجه و لكن تقدري بكل سهوله تستخدميه علي للجسم كمان

و لوشن ده من اخف المرطبات اليوميه في القوام و ترطيبه مش قوي لكنه اختيار كويس

و للاسف مشكلته انه غير متوفر في مصر بشكل كبير رغم جودته.

السعر : 171 جنيه مصري تقريبا / السعه : 237 مل.

6- كريم يورياج هيسياك آر / Uriage Hyseac R Cream

كريم يورياج هيسياك آر /  Uriage Hyseac R Cream
كريم يورياج هيسياك آر / Uriage Hyseac R Cream

كذلك كريم يورياج فيه مميزات كتير الحقيقه عن كريمات تانيه في نفسر سعره

و من اهم المميزات دي انه بيوعد بمظهر اقل لمعان للبشره و كلنا طبعًا بنعاني من المظهر اللامع ده لو بشرتنا دهنيه ،

كمان بيهدّي من احمرار الجلد نتيجة التعرض للشمس و اقوي ميزه فيه انه قوامه بين الجل و الكريم يعني خفيف جدًا.

السعر : 299 جنيه مصري / السعه : 40 مل.

5- ايزيس فارما تين ديرم هيدرا / Isis Pharma Teen Derm Hydra

ايزيس فارما تين ديرم هيدرا / Isis Pharma Teen Derm Hydra
ايزيس فارما تين ديرم هيدرا / Isis Pharma Teen Derm Hydra

كما ان مرطب ايزيس فارما الخاص بالبشره الدهنيه يعتبر واحد من الكريمات المتوسطة الجوده

و قوامه خفيف و سهل الامتصاص بالنسبه للبشره الدهنيه مع الحفاظ علي انه ميسدّش المسام خالص طبعًا ،

و من اهم مميزاته انه بيضيف للبشره مظهر غير لامع و تقدري تستخدميه مرتين يوميًا

بعد خطوة التونر مع ضرورة استخدام واقي الشمس اثناء فترة النهار

و هو كمان سعره متوسط بالاضافه لجودته المتوسطه.

السعر : 189 جنيه مصري / السعه : 40 مل.

4- بايوديرما سيبيم هيدرا / Bioderma Sebium Hydra

بايوديرما سيبيم هيدرا / Bioderma Sebium Hydra
بايوديرما سيبيم هيدرا / Bioderma Sebium Hydra

واعتقد ان مفيش واحده مننا مسمعتش عن بايوديرما و ده من سنين طويله من اول ما بدأوا دكاترة الجلديه يتكلموا عنها في البرامج التليفزيونيه و هي واحده من الماركات الفرنسيه الجيده

و بشكل خاص الكريم ده من بايوديرما يعتبر فعلًا واحد من كريمات ترطيب البشره الدهنيه المناسبه لانه مش بس بيرطب البشره هو كمان بينظّم افراز الدهون ،

و بيحتوي علي مجموعه من المكونات اللي بتهدّي اي احمرار او التهابات في الجلد زي الألانتوين مثلأ و كمان الجلسرين المعروف بقدرته علي ترطيب البشره و بالتأكيد مناسب للاستخدام قبل المكياج.

السعر : 299 جنيه مصري. / السعه : 40 مل.

3- كريم بيبانثين / Bepanthene Cream

كريم بيبانثين / Bepanthene Cream
كريم بيبانثين / Bepanthene Cream

بيبانثين من الماركات اللي للاسف مش معروفه علي نطاق كبير زي باقي الماركات رغم ان عندها مجموعه رائعه من مرطبات و ملطفات الجلد و حابه اكلمكم عن كريم منهم

و هو كريم ترطيب البشره و اللي بفضّله بشكل شخصي لانه خالي من العطور و بالتالي هيناسب البشره الحساسه بدون ما يسبب اي تهيج او احمرار للجلد

و كمان سعره مناسب للكل تقريبًا.

السعر : 70 جنيه مصري / السعه : 30 جرام.

2- أفين كلينانس هيدرا / Avene Cleanance Hydra

أفين كلينانس هيدرا / Avene Cleanance Hydra
أفين كلينانس هيدرا / Avene Cleanance Hydra

مثل منتجات أفين فرنسيه علاجيه و تعتبر من أفضل المنتجات علي مستوي العالم و كمان هي صاحبة اول مياه حراريه في العالم

و بالتالي الكريم ده غني جدًا بالمياه الحراريه اللي زي ما قولنا بتلطف و ترطّب الجلد و قوامه خفيف مستحيل يسد مسام البشره او يتسبب في ظهور حبوب ،

كمان هو ممتاز للبشرات الدهنيه اللي ضعفت بسبب علاجات حب الشباب زي الرواكوتان و النت لوك و غيرهم و تقدري تستخدميه قبل المكياج بسهوله تامه

و اضمنلك لوك نهائي طبيعي و ناعم علي البشره ، متوفر في جميع الصيدليات.

السعر : 249 جنيه مصري. / السعه : 40 مل.

1- كريم لاروش بوزيه ايفاكلار اتش / La Roche-Posay Effaclar H

كريم لاروش بوزيه ايفاكلار اتش / La Roche-Posay Effaclar H
كريم لاروش بوزيه ايفاكلار اتش / La Roche-Posay Effaclar H

وفي النهاية منتجات لاروش بوزيه تعتبر من أفضل المنتجات الفرنسيه العلاجيه و اللي كتير مننا يعرفها

و المرطب ده منها تحديدًا بيتميز بمواصفات كتيره تخلينا نعتبره افضل مرطب للبشره الدهنيه بالسعر ده و ده لأنه مناسب للبشره الحساسه و تم اختباره من اطباء الجلديه ،

غير كده هو كريم خفيف جداً و بسهوله بشرتنا تقدر تمتصه بشكل كامل و كمان بيحتوي علي نسبه عاليه من المياه الحراريه اللي بتساهم بدورها في تهدئة و تلطيف الجلد

، و الكريم ده كمان مخصص للبشرات الدهنيه اللي جفّت بسبب علاجات حب الشباب بالاضافه لانه خالي من البارابين.

السعر : 269 جنيه مصري. / السعه : 40 مل.

أفضل 10 زيوت لتطويل الشعر

‫2 تعليقات

اترك تعليقاً

لن يتم نشر عنوان بريدك الإلكتروني.

مقالات ذات صلة

زر الذهاب إلى الأعلى
error: Content is protected !!