محتوي المقالة
دلوقتي بنات كتير جداً و الغالبيه العظمي بقت بتستخدم مكياج سواء الصبح في الشغل او الجامعه او بالليل في المناسبات و الخروجات المهمه، لكن رغم ان الكل بقي مهتم بانه يحط مكياج للاسف مش الكل مهتم بخطوة ازالة المكياج ده و بيفكروا في انه طالما المكياج ده من ماركات معروفه فـ هو مش هيضر بشرتنا، و ده طبعاً اكبر غلط و اكبر كارثه تعمليها في حق بشرتك هي انك تنامي بالمكياچ لان خلايا البشره بتتجدد اثناء النوم فـ تخيلي ايه هيحصل لو بشرتك مسامها مسدوده و انتي اصلاً نايمه ! هشارك معاكم في الموضوع ده أفضل 10 أنواع مزيل مكياج و هستني تشاركونا تجربتكم.
أرخص مزيلات مكياج في مصر
وجود المكياج علي بشرتك اثناء فترة النوم او لفترات طويله عامًة ده قادر يدمر بشرتك بجداره و يكوّن رؤوس سوده كتير جداً و حبوب علاجها صعب و قادر كمان انه يسببلك التهابات في العين و هالات سوداء ناتجه عن الكونسيلر و غيرهم كتير من المشاكل علشان كده مهما كنتي مرهقه او مكسله مينفعش ابداً تكسلي عن ازالة المكياج، ومزيلات المكياج بتتنوع ما بين الانواع السائله او المناديل المبللة و برده بتختلف ما بين مياه الميسلار او مزيلات المكياچ الزيتيه و كل حاجه منهم ليها مميزات و عيوب هنتكلم عنها و تقدري تختاري اللي يناسبك من افضل ميكب ريموفر.
ازالة المكياج بطريقه صحيحه
علشان تمسحي المكياج بتاعك خصوصاً لو مكياج تقيل او مقاوم للمياه من غير ما تضري بشرتك او تجهديها معاكي فـ انتي اولاً محتاجه تستخدمي افضل مزيل ميكب بـ معني انه مش منطقي تبقي مستخدمه مكياج مقاوم للمياه و تحاولي تمسحيه بـ مياه ميسلار ! ازاي مياه هتقدر تمسح حاجه اصلًا بتقاومها ! وقتها هتبقي بس بترهقي بشرتك و بتتعبيها و الصح تستخدمي مزيل ميك اب زيتي ترجيه كويس جداً و تاخدي منه كميه مناسبه علي قطن ناعم و تبدئي تمسحي بشرتك بالراحه.
أكتر منطقه رقيقه و حساسه في بشرتنا هي منطقة حوالين العين علشان كده و انتي بتمسحي المكياج الخاص بالعيون لازم تكوني لطيفه اد ما تقدري، و الطريقه الصح هي انك تاخدي كميه من افضل مزيل ميكب علي قطنه و تثبتيها علي عينك لمدة 5 ثواني تقريبًا لحد ما تدوّب المكياج و تفكك جزيئاته و اسحبيها بشكل رقيق، لكن ضروري تتجنبي فرك عينك اثناء ازالة المكياج لان دي عاده هتسرّع ظهور التجاعيد و الخطوط و كمان الهالات السودا ده غير انها هتوقّع رموشك و تضعفهم.
أفضل مزيل مكياج
10- ماء ميسيلار جارنييه / Garnier Micellar Water
أفضل مزيل مكياج حيث ان في فتره قصيره جداً بقت ماء ميسيلار جارنييه افضل مزيل ميكب في العالم و اتعمل لها حملات اعلانيه كبيره جداً لكن للأسف و بتجربتي الشخصيه هي متستحقش الضجه ابداً، مبتقدرش ابدًا تمسح المكياج غير بس لو خفيف يعني لو انتي من البنات اللي بتستخدم مكياج بسيط جداً هي هتناسبك غير كده مش هنصحك بيها، ميزتها ان متوفر منها حجمين حجم صغير و حجم كبير و مش بتسيب اي طبقه غير مرغوب فيها علي الجلد بس زي ما وضحت هي للاسف مش بتمسح المكياج كويس.
يبلغ سعره حوالي 170 جنيه مصري.
9- ماء ميسيلار ايڤون غني بالزيوت / Avon True Nutra Effects Oil-Infused Micellar Water
من افضل انواع مزيل المكياج منتجات ايفون بيحبها بنات كتير لانهم يقدروا يشتروها من الماركه نفسها من خلال مندوبين لها في بلدهم او محافظتهم علشان كده كان لازم نتكلم عن مياه الميسيلار الغنيه بالزيوت من ايفون و اللي بتتميز بسعرها الرخيص جداً، هي عباره عن مياه ميسيلار مضاف لها زيت و تستخدميها عن طريق رج المنتج و بالفعل هي من الاختيارات الجيده جداً لكن عدم توافرها في الصيدليات برده يقلل من افضليتها كمان هي مش بتمسح المكياج التقيل بشكل كبير و كمان احيانصا بتسبب حرقان في العين.
يبلغ سعره حوالي 185 جنيه مصري.
8- مزيل مكياج نيڤيا للتفتيح الطبيعي / Nivea Natural Fairness Eye Make-up Remover
نيفيا افضل انواع مزيل المكياج للتفتيح الطبيعي مدعم بفيتامين C المعروف بقدرته العاليه علي التفتيح لكن علشان اكون صريحه معاكم لازم اقول ان ده اسلوب من اساليب الدعايا و ان مفيش مزيل مكياج هيقدر يفتّح بشرتك خالص ، لكن بعيدًا عن النقطه دي هو ممتاز في ازالة المكياج و تعليبه كمان محترم تقدري تشيليه في شنطتك بأمان ، وبيميز نيفيا انها كتير بتنزل ضمن عروض الصيدليات الكبيره في مصر.
يبلغ سعره حوالي 130 جنيه مصري.
7- ماء ميسيلار جارنييه غني بالزيت / Garnier Micellar Oil Infused Make-up Remover
ماء ميسيلار جارنييه المضاف له زيت للاسف غير متوفر بشكل كبير في مصر لكنه احياناً بيتوفر في الصيدليات، يعتبر اختيار ممتاز و مختلف تماماً عن مياه الميسيلار العاديه كما انه من افضل انواع مزيل المكياج لانه بيمسح المكياج نهائيًا من البشره حتي المقاوم للمياه و مش بيسيب طبقة زيت غير مستحبه علي الجلد و طبعاً علشان تبقي فعاله معاكي لازم ترجيها كويس و هكرر تاني نصيحتي ليكم بضرورة غسل الوجه بعد ازالة المكياج بأي طريقه من الطرق، متوفره كمان اونلاين عند Sellers كتير.
يبلغ سعره حوالي 199 جنيه و حجمه 400 مل.
6- ماء ميسيلار بايوديرما سينسيبيو / Bioderma Sensibio H2O Micellar Water
تقريباً ده من افضل انواع مزيل المكياج من سنين كتيره جدا و مش بس في مصر لا في الشرق الاوسط و العالم كله و ميزته الكبيره انه مناسب تماماً للبشره الحساسه و انه من ماركه طبيه محترمه زي بايوديرما لكن هو مش من مزيلات المكياج القويه للاسف يعني مبيقدرش يفكك جزيئات المكياج المقاوم للمياه بسهوله و ده امر منطقي لانه هو اصلًا عباره عن مياه، بس لو المكياج عادي مش مقاوم للمياه بيقدر يمسحه تماماً و ينضف البشره جداً.
يبلغ سعره حوالي 690 جنيه مصري.
5- مناديل چونسون لازالة المكياج / Johnson’s Make-up Remover Wipes
مناديل جونسون المبلله مشهوره في مصر من سنين بكفائتها في ازالة المكياج خصوصاً ان سعرها من وجهة نظر ناس كتير مش غالي بس انا وجهة نظري مختلفه لان سعرها فعلا رخيص لكن هي فيها 25 منديل بس فـ هي مش اقتصاديه لان المنديل هتمسحي بيه مره واحده و هترميه، و نصيحتي ليكي لو شايفه سعرها مناسب اشتريها لكن اقسمي المنديل الواحد بالنص علشان تقتصدي في استخدامها، غير كده هي بتمسح المكياج تماماً حتي المقاوم للمياه بس عيبها انها خشنه علي الجلد و كمان التغليف مش كويس فـ بيعرض المناديل الباقيه للبكتيريا بسهوله.
يبلغ سعره حوالي 70 جنيه مصري.
4- ماء ميسيلار اڤين كلينانس / Avène Cleanance Micellar Water
افين من الماركات الطبيه اللي اتكلمنا عنها كتير في مواضيعنا و كان لمنتجاتها نصيب ضمن أفضل 10 مرطبات و غسولات و حاجات تانيه كتير، و كمان هيكون لمياه الميسيلار من افين نصيب تبقي من أفضل 10 أنواع مزيل مكياج معانا و ده لان النوع ده منها مخصص للبشره الدهنيه المعرضه للحبوب فـ هي مش بس هتمسح الميك اب لكن كمان هتنظم الافرازات الدهنيه البشره و هتسيطر علي ظهور الحبوب ، و رغم ان بشكل شخصي مش بفضل مياه الميسيلار الا ان النوع ده فعلًا مختلف و بيمسح المكياج كله بشكل رائع.
يبلغ سعره حوالي 690 جنيه مصري.
3- مزيل مكياج ايڤا بالكولاچين للعيون و الشفاه / Eva Collagen Make-up remover for Eyes & Lips
رغم ان منتجات ايڤا مش ألطف حاجه الا ان مزيل الميك اب ده منها فعلًا مختلف ويعد افضل مزيل ميكب و بيميزه سعره الرخيص وانه مش بيسيب طبقه دهنيه تقيله علي البشره لان الزيت الموجود فيه خفيف و دي ميزه وعيب في نفس الوقت؛ ميزه لان زي ما قولنا مش بيسيب طبقه دهنيه و عيب لانه مش بيمسح المكياج من اول مره و بتحتاجي تعيدي عليه تاني بالاضافه لعيب كمان و هو ان التعليب بتاعه للاسف مش حلو و مش هتقدري تسافري بيه مثلًا بس لازم نقول انه فعلًا بيمسح المكياج حتي المقاوم للمياه و سعره الرخيص هيفضل بيميزه و يخلي كتير من البنات تشوف عيوبه دي بسيطه ، ضروري ترجيه قبل الاستخدام علشان الزيت يندمج مع المياه.
يبلغ سعره حوالي 125 جنيه مصري.
2- مزيل مكياج نيڤيا للعيون بمفعول مضاعف / NIVEA Double Effect Eye Make-Up Remover
مزيل مكياج نيفيا يشبه كتير لمزيل مكياج لوريال اللي اخد المركز الاول معانا في أفضل 10 أنواع مزيل مكياج. هو من فئة المزيلات الزيتيه اللي ضروري رجها قبل الاستخدام. و بيقدر يمسح الميك اب بالكامل سواء من علي الشفايف او العيون او حتي الوجه. لكن كفاءته اقل شويه من لوريال يعني مش بنفس الكفاءه. و سعره كمان اعلي منه بس توافره في مصر في الصيدليات برده شيء ممتاز و سعره ما زال في نطاق المتوسط. ومش بيسيب طبقه دهنيه غير مرغوب فيها علي البشره لكن ده ميمنعش اننا برده هنغسل وشنا بالغسول بعده.
يبلغ سعره حوالي 166 جنيه مصري.
1- مزيل مكياج لوريال للعيون و الشفاه / L’ORÉAL Absolute Make Up Remover Eye & Lip
لوريال يعتبر من أفضل 10 أنواع مزيل مكياج موجود في مصر لأسباب كتير. وهي انه متوفر في الصيدليات فـ سهل تلاقيه غير كمان ان سعره متوسط و في متناول فئه كبيره من البنات. ورغم انه بيوعد بازالة مكياج العيون و الشفايف. واللي معروف انهم غالبًا بيكونوا مقاومين للمياه. وبيحتاجوا مزيل مكياج زيتي الا انه كمان بيقدر يمسح مكياج الوجه بكفاءه عاليه. يعني تقدري تستخدميه للوش كله من غير اي قلق لكن طبعًا هو بيسيب طبقه زيتيه خفيفه علي البشره. وضروري جداً تغسلي وشك بالغسول المناسب بعده. و بفكرك بضرورة رجه قبل الاستخدام.
يبلغ سعره حوالي 156 جنيه مصري.
